uMthunywa
Cornelius Luphahla
KULANDELA indaba ephume kuphephandaba leli kuviki ephelileyo yendoda yeMbondo eLupane etshaywe ngondofa yafa kubangwa ilifa, sokuzwakale ukuthi imuli le okucatshangelwa ukuba yiyo elesandla ekufeni lokhu isithwele amagabha avuzayo ngenja ekhulumayo.
Kuzwakale ukuthi ngemva kwamalanga amane uNgqabutho Ndlovu ebhubhile imuli le ecatshangelwa ukuba yiyo elesandla kulokhu yaqala ukuhlutshwa yinja ebonwa yiyo yodwa.
Esinye isakhamuzi sakule indawo esithande ukubizwa ngokuthi nguNcube sibikele intatheli ukuthi imuli le ebona inja yodwa kukhanya ilesazela ngokufa kukaNgqabutho.
“Imuli le igangile sibili, kukhanya yibo abatshayisa uNgqabutho ngezinto kodwa laba abanye basebesiya dinga osiyazi yikho nje sebethwele nzima ngenja le emnyama.
“Isiphetho inja le izababulala ngoba kuthiwa ingena izindlu zonke zivaliwe ebusuku sebeze belala ndawonye. Abanye abantwana sebaze babaleka besesaba inja le,” kutsho uMnu Ncube.
Ekhuluma loMthunywa uNkszn Busi Ndiweni ongunina kamuyi ubike ukuthi yena kazake ayibone inja leyo ngakho uyamangala nxa kuthiwa kulenja ehluphayo.
“Mina labantwabami asikaze siyibone inja leyo abahlala bekhuluma ngayo kodwa sihlala muzi munye. Isimanga yikuthi inja leyo ibonwa ngunyanewethu labantwabakhe kuphela, singazi kumbe liqiniso,” kutsho uNkszn Ndiweni.
Uqhubekele phambili njalo wala ukuthi wadinga inyanga ngemva kokufa komntanakhe.
“Ngiyamangala ngoba abantu bathi inja le ngiyayazi ngoba ngahamba kubosiyazi ngemva kokubhubha komntanami kodwa kayisilo iqiniso lelo. Mina kangazi lutho mhlawumbe inja le isazobuya lakimi ngoba ngeke ikhethe bona bodwa nxa bengayonelanga,” kuphetha uNkszn Ndiweni.
UMthunywa uxhumane loMnumzana Bhekani Ndlovu ongumntakaSakheleni Ndebele ocatshangelwa ukuba ulesandla ekufeni kukaNgqabutho, wachaza ukuthi inja le yenza izimanga ngoba ibonakala sisendlini njalo iyakhuluma.
“Ngemva kwamalanga amane umfowethu ebhubhile kwathutsha inja enkulu emnyama igqize ubuhlalu yafika yangena endlini. Sithe sisamangele sayizwa ikhuluma ithi idinga umuyi, uNgqabutho, kodwa kakho owaphendulayo yaze yaphuma yahamba.
“Yaphinda yabuya sisemkulwini ntambama njengemuli yafika yangena kuvaliwe sayibona isiphakathi yathi idinga umuyi,” kulandisa uMnu Ndlovu.
