uMthunywa
YiNtatheli kaMthunywa
KULOKUDONSELANA phakathi kwabafundisi bebandla leTwelve Apostolic Church of Christ nanko phela omunye walababafundisi ocatshangelwa ukuthi uhuquluza imali yebandla utheleke ebandleni ehamba lamapholisa kumaviki amabili edluleyo uMthunywa uyakuveza lokhu lamhlanje.
Impi le kubikwa iphenduke isimanga lakumalunga ebandla esebona umkhulu webandla uManners Ngwenya ehamba lamapholisa ethi kabophe umfundisi.
Kuzwakale ukuba umfundisi uNgwenya ubehlala edonselana labanye abafundisi ethi ufuna ukutshumayela kodwa abantu besala ngoba kucatshangelwa ukuba uhuquluza imali yebandla.
Kubikwa umfundisi uNgwenya wacina emiswa kodwa wala ukwamukela isinqumo lesi okuyikho okwenza kwaqala ukuba lokuxokozela ebandleni.
UMthunywa ukhulumisane lomunye wenkokheli zalelibandla eliseNketa othande ukubizwa ngokuthi nguNdlovu wachaza ukuthi umfundisi lo waqala ukukhathaza lokhu ebandleni leNketa ngemva kokumiswa.
“Umfundisi lo waqala ukukhathaza ngemva kokutshontsha imali yebandla wasuka lapho wadiliza isisekelo sebandla ngenhloso yokuvala ukuthi abuzwe ngemali njengoba isisekelo sebandla sivuma ukuthi abuzwe ngemali nxa ingaseneli. Ngemva kwalokho wahamba wayabhalisa ibandla kunhlanganiso yamabandla atshiyeneyo iACCZ wasezibhalisa esiba nguArchbishop abanye abafundisi wababhalisa babangaphansi kwakhe,” kutsho uMnu Ndlovu.
UMnu Ndlovu uqhubekele phambili njalo wachaza ukuthi abanye abafundisi bathi bekunanzelela lokhu bamthonisisa bamisa yena wala.
“Abanye abafundisi bathi bekunanzelela lokhu bamthonisisa basebemisa yena wala wathi nguye omkhulu ebandleni leli ngakho ngeke amiswe ngumuntu.
“Lokhu kwadala ukuthi nxa ezama ukutshumayela abazalwane basukume bame ngezinyawo abanye bahlabele,” kutsho uMnu Ndlovu.
Elinye ilunga lebandla leli liveze ukuthi bamangala kuviki ephelileyo umfundisi lo ethutsha lamapholisa enkonzweni.
“NgoMgqibelo sisenkonzweni umfundisi lo wathutsha lamapholisa ethi azobopha abazalwane abangafuni ukuthi akhokhele ibandla eNketa. Inengi labazalwane lasuka labuyela ezindlini zalo kwathi ngeviki elandelayo bayakhonza kweyinye indawo.
“Yikho okwadala ukuthi ame ukuhlupha kithi eNketa waya kwamanye amabandla lakho bamenza njalo khathesi sehlupha eCowdray Park,” kulandisa umzalwane lo.
Ekhuluma lentatheli omunye wabafundisi bebandla leCowdray Park uMfundisi uSilas Ncube uchaze ukuthi sebekhathele ngomfundisi lo ngokudunga ibandla.
“Umfundisi lo sesihluphile sesiswele lokuthi senzeni ngoba usesithwalise nzima ebandleni. Ngikhuluma nje wabuya lencwadi yegqwetha ethi kufanele simvumele akhokhele ibandla singekela sizabotshwa.
“Ngemva kwalokho wayabuya le-court order ethi kufanele siye emthethwandaba kungakedluli amalanga angu-10, sahamba-ke sayakhuluma amacala kamfundisi lo. Ngemva kwalokho lathi sadinga elethu igqwetha ngakho lokhu silindele ukuya emthethwandaba ngoba manje yena lokhu ebuya ethi ufuna ukukhokhela abazalwane bale yikho sokuhlala kulomsindo ebandleni,” kutsho uMnu Moyo.
Omunye wabakhonza kulelibandla leCowdray Park uNkosazana Lisca Masuku uchaze ukuthi sebeze bengasayi enkonzweni ngenxa kamfundisi lo.
“Thina sesize singasayi enkonzweni ngenxa kamfundisi lo ngoba uhlala ebangela ukuthi kube lokudonselana lokulwa ebandleni. Ngikhuluma nje inengi labazalwane kalisakhonzi ngenxa yakhe,” kutsho uNkszn Masuku.
Ebuzwa ngale indaba uMfundisi Manners Ngwenya uchaze ukuthi ngeke akhulume okunengi.
“Njengoba nje kuzindaba zenkonzo lezi ngeke ngizikhulume kuwe ngoba kulekhomithi yebandla okufanele ikukhulume.
“Okunengi kubuze kwamanye amabhishopi afana lami,” kutsho uMfundisi uNgwenya.
