uMthunywa
Nkosilathi Sibanda
AVUMILE amanye amadoda ukuthi asezame kwehlula ukuthi agenqule uNorman Mapeza njengengqwele yenguqu yakuleli.
Umqeqetshi weFC Platinum lo uqeda isizini ehambela phezulu ngoba ubengumqeqetshi owedlule bonke njalo leqembu lakhe lithwala inkezo yeCastle Lager Premier Soccer League.
UMapeza useyintshantshu kane ekhuza amaqembu kuligi ephakemeyo. IFC Platinum layo isithwale inkezo yeligi kane amasizini elandelana kusukela 2017.
IFC Platinum
Iminyaka yonke le, kwehlule ukuthi kube lomqeqetshi othathela uMapeza isicoco, okuveza ukuba lumqeqetshi usengene kumbali yengcitshi zabaqeqetshi beligi ephakemeyo.
Sebeke bazama ukuthi bamkutule kodwa kwaphetha kufana, uMapeza ephiwa isicoco. Ubukhulu lobuciko bobuqeqetshi bukaMapeza babatshazwa nguKelvin Kaindu owake waqeqetsha iHighlanders leHow Mine kuleli.
UKaindu ayisuye yedwa owancoma uMapeza. Banengi abaqeqetshi asebephume enkundleni yeMandava benqotshiwe. Abadlali bakaMapeza bebenqoba futhi lasemangweni, bencitsha ezinye ithuba enkundleni.
Abalandeli labathandi bomdlalo bayavuma ukuthi uMapeza usenze imbali. UMthunywa uxhumane labathandi bakanobhutshuzwayo wePSL, ababike ukuba basele belomhawu ngalokhu okwenziwe yiFC Platinum loMapeza.
Umsekeli weHighlanders owaziwayo uNkanyiso “SaMaDube” Mthembo, ekhuluma lentatheli kaMthunywa ubike ukuba ufisa ngabe leqembu lakhe liyathola abaqeqetshi labadlali abazimisele njengoMapeza.
“Ukubuka into enhle kuhle. Njengabasekeli beHighlanders sithi amhlophe aphindwe kanengi kuNorman Mapeza lakuqula leFC Platinum lonke. Sibatshayela ihlombe kodwa silusizi ukuthi thina kuHighlanders lokhe silinde ukuthi inkezo iphenduke kithi.
“Ngabe lathi sithola abaqeqetshi abenelisa ukuguqula abadlali ngendlela uMapeza aguqule ngayo iFC Platinum, aluba sikhatshana,” kutsho uMthembo.
Norman Mapeza
UCharlotte Sibanda osekela iqembu leHwange, elizangena kuPSL ngomnyaka ozayo uthe unanzelele ukuba uMapeza ngumqeqetshi oqala wafunda isimo samanye amathimu ayizitha zakhe, andubana ahlasele.
“UMapeza ukhaliphile, kumele sikuvume lokhu. Ngimbona engumqeqetshi ophinda abengumkhokheli futhi. Uyahlolisisa isitha ahlangana laso, abekwazi ukuthi uhlasela njani ukuze anqobe.”
Amalunga equla labasekeli beFC Platinum abahlala edolobheni leZvishavane bethule umbiko wabo ngeviki edluleyo bebonga uMapeza ngokubekezela kwakhe eseqenjini. Bathe iqembu libaphakulele iKhisimusi.
“Silesizatho sokuthakazelela iKhisimusi ingakafiki. Abafana bethu basebenzile, badlale ibhola njengebhola,” kutsho uMoyo.
Ekhuluma esecingweni ngoLwesibili, isikhulume seFC Platinum uChido Chizondo uthe loba bejabulele ukuba zintshantshu, bahlezi beqaphele ukuthi kunengi okumele kwenziwe eqenjini.
Uthe ukunqoba abakwenzileyo kuqinisa uhlelo lokukhuliswa kweqembu okukhangelelwe ukuthi kubelempumela enhle kusiyafika kumnyaka ka-2024.
“Inhloso yikuqhubeka ngokuthuthukisa ithalenta elisakhulayo, njengokuqondiswa luhlelo lwethu olufinyelela ku-2024,” nguChizondo.
Kusenjalo, abafana bePure Platinum Play bazanikezwa inhlonipho yentshantshu ivela eqenjini leCranborne Bullets enkundleni yeMandava ngoMgqibelo.
Zombili zidibana okokucina kulisizini, nanko iligi iyagqitshwa ngempelaviki. Loba umdlalo lo ubalulekile kumbali yeligi yeCastle Lager, kubadlali beFC Platinum uzafana leminye nje ngoba bona babizwa njengentshantshu kumaviki amathathu adluleyo.
Imidlalo yeCastle Lager yokucina:
NgoMgqibelo: ZPC Kariba v Herentals (Nyamhunga), Black Rhinos v Bulawayo City (Vengere), Ngezi Platinum Stars v Whawha (Baobab), Chicken Inn v Triangle United (Luveve), FC Platinum v Cranborne Bullets (Mandava), Harare City v Highlanders (National Sports Stadium)
NgeSonto: Tenax v Manica Diamonds (Sakubva), Bulawayo Chiefs v Yadah (Luveve), Dynamos v Caps United (National Sports Stadium).
