uMthunywa
Mehleli Dube
Thina abomdaka omnyama, inengi lethu silenkolelo yokuthi, indoda yindoda ngesibaya, yikho mhlawumbe kwakuvamile, izolo ukuthi uthole leyo ndoda ilamakhosikazi amanengi, izale itshatshamise, bagcwale iguma abantwana.
Phela yayithatha isithembo ngoba ikwazi ukuthi izawunakekela umdeni wayo, kudliwe kusuthwe, kukhonjwe ngophakathi. Noma nje isithembo sileziganekiso saso, singcono ngoba abantwana bakhula besazana, njalo wena mnikazi ungasiphatha ngekhono langesizotha kasihluphi kangako.
Kulezinsuku amadoda amanengi ayasenyanya isithembo baphange badinge lokhu abakubiza ngokuthi ngamasmall house, omakhwapheni kumbe inyantsi. Ufica indoda elomkayo owaziwa ngumdeni isihlanyiswa ngumakhwapheni.
Kanengi laba abaziwa ngumdeni, bangabe besaziwa ngababili kumbe abathathu nje kuphela. Abanye abalemali zabo baze babathengele lezindlu kumbe babakhele lemizi.
Abanye njalo bathi lidlalicatsha ngenxa yokuthi abaziwa emdenini. Kuyahlupha ukuba labomakhwapheni, ngikhumbula umngane wami uJabu wathi esedlule emhlabeni, ngelanga lomngcwabo, kwathutsha idlalicatsha liqhuba abantwana bakamufi abathathu abafana loyise xathu.
Kakho ngitsho lamunye owathandabuza ukuthi ngabantwana bakaJabu, kodwa unina wabo bengamazi. Kwala ngitsho ukuthi laye aziveze ngoba esesaba ukuthi mhlawumbe umka Jabu angavuka ukeketani amxotshe okwebhubesi lixotsha imbabala ewatheni.
Into ezwisa ubuhlungu yikuthi abantwana bona, uyise bayabe bemazi kodwa izihlobo zakoyise bengazazi. Kusuka kubaphathe kubi emoyeni yabo ngoba bayabe bengazwisisi ukuthi kungani unina wayebafihlela izihlobo zabo.
Kuthi lalapho nxa sekusatshiwa impahla bona abatholi lutho ngoba umdeni ungabazi njalo futhi kwesinye isikhathi bayabe besebenzisa isibongo sikanina, kuze kuzwele ezinye izihlobo zibona ukufana kwabantwana labofowabo.
Phela nxa ungaphumelanga obala ukuthi sokulomunye umama uhlala ungumuntu wamanga njalo lengqondo ayitholi sikhathi sokuphumula, uhlala ungodla amathambo engqondo njalo nje. Nxa kunguwe okhokha indleko ezifana labo rent ngitsho lokuthenga impahla uyabe usucabanga ukuthi nxa wena usemzini wakho yena uyabe elomunye.
Phela abakwaziyo bathi akufikwa kulengiswe izandla. Bathi enye indoda bayithuka bathi uza ulengise izandla angani ngumuntu ovela emangcwabeni. Madoda liqaphele bathi kulamanye amadla ecatsha ahlakaniphe kabi, bathi balabobaba abanengi abanye ngabokulungisa inwele, abanye ngabokubhadala imali zesikolo zabantwana abangesibabo, bakhona njalo abayibo abatshaya imvelo. Yikho mhlawumbe obaba abanengi bebulawa yistress labo BP.
Ayixabene
Mehleli Dube 0772673682
