uMthunywa
Cornelius Luphahla
KULANDELA udaba lokuswelakala kwenkosi yamaNdebele koMthwakazi okweminyanga edlula ikhulu umphakathi usulubekile usuku lokugcotshwa kwenkosi yesithathu yakoMthwakazi.
Inkosi le, uMnumzana Stanley Raphael Khumalo oyisizukulwane sikaHlangabeza Khumalo owayengumntwana wenkosi uMzilikazi kubikwa uzethulwa ngokusemthethweni mhlaka 12 Mpandula.
Ekhuluma emkhosini wokwethulwa kwakhe kuzulu eLarge City Hall koBulawayo ngoMgqibelo kuviki ephelileyo uMzilikazi II ulandise imbali yakhe ngokugcweleyo emphakathini.
“Mina ngokuzalwa ngiyisizukulwane senkosi uMzilikazi ngoba ubaba wami nguGeza ozalwa nguMdlomelo, yena ezalwa nguKhuhlumba Khumalo ozalwa nguHlangabeza, yena ezalwa yinkosi uMzilikazi kuthi unina nguMaNxumalo.
Ngalokhu mina ngakhuliswa ngesibongo sakoTshuma ngoba ukhokho wami uKhuhlumba wabaleka esigodlweni senkosi ngesikhathi amabutho enkosi uLobhengula efuna ukumjuqa ngemva kokubulala kwabo uyise uHlangabeza.
“Ukhokho wafihlwa yisalukazi esithiwa nguBahanga Batema esilulwini kwelePlumtree amabutho enkosi amdinga amswela. Kuthe ngemva kokuphenduka kwawo ukhokho wahle wakhuliswa ngesibongo sakoTshuma ngoba umdeni lo wawungowakoTshuma noma nje mina khathesi sengisebenzisa isibongo sakithi koKhumalo. Ngalokhu khathesi ubukhosi lobu kayisikho ukuthi ngazikhethela kodwa ngazalwa ngibugcotshiwe njalo sengileminyaka engu 15 ngihlupheka ngoba ngaqala ngingafuni ukubuthatha kodwa khathesi sengizimisele ngoba nxa ngingasakwenzanga lokhu ngeke ngiphumule ukuhlutshwa nguNkulunkulu kanye labaphansi. Ngokunjalo bonke abantu ngiyabamukela ebukhosini bami,” kutsho uMnu Khumalo.
Isikhulumi senkosi uMzilikazi II uMnumzana Greater Sibanda uthe uzulu alindele ukugcotshwa kwenkosi ngoMpandulo wabuya wathi ukugcotshwa kwayo kuzavuselela amasiko.
“Njengoba inkosi izichazile emphakathi ngakho uzulu kalindele usuku lokugcotshwa kwayo ngokusemthethweni mhlaka 12 Mpandula kodwa indawo ezagcotshelwa khona kayikahlelwa. Ngalokhu nginxusa uzulu wonke ukuthi aphatheke emkhosini lo ngoba kukhulu azakufunda.
“Okunye njalo ukugcotshwa kwenkosi uMzilikazi II kuzathuthukisa amasiko akuleli ngoba minengi imikhosi eqhutshwa yinkosi kuphela kodwa engasaqhutshwayo kwelakithi ngenxa yokuswelakala kwenkosi. Imikhosi le izavuka ngemva kokugcotshwa kwenkosi okuyikho ukuvuseleleka kwamasiko akuleli,” kutsho uMnu Sibanda.
Imizamo yokukhuluma loPeter Zwide Khumalo oyisikhulumi samaKhumalo yehlule ngoba ucingo lwakhe kalubanjwanga muntu.
