uMthunywa
Cornelius Luphahla
IDIDEKILE njalo kayisakwazi ukuthi ibambeni itshiye kuphi indoda yesigabeni seWulube eLupane nanko phela isiphelelwe zinkomo lomuzi wayo usuhlala ulavuka amalangabi okucatshangelwa ukuthi utshiswa ngondofa bayo abayihlamukelayo.
Indoda le, uMnumzana Velaphi Moyo useleminyaka emibili etshelwa yizindlu emzini wakhe lenkomo zisifa njalo uthi lokhu kubangelwa yikuthi waphambanisa umthetho womthuso awutshiyelwa nguyise.
UMthunywa uvakatshele kule indawo wakhulumisana loMnumzana Jacob Dube wathi uMoyo uyaziwa ukuthi ulabondofa asebemqedele izifuyo lezindlu njalo emzini wakhe akudlulwa ebusuku ngoba uyalahleka.
“UMoyo uyaziwa lapha esigabeni ukuthi ulabondofa njalo wonke umuntu uyamesaba. Nxa ungadlula emzini wakhe ebusuku uyalahleka ngoba ubona abantu abafitshane uhle ungasayiboni indlela.
“Ondofa laba yibo asebemqedele inkomo ngoba wayelenkomo ezinengi kakhulu khathesi sesele lezintathu kuphela. Okungimangalisayo yikuthi ondofa laba sebemtshisela izindlu iminyaka yonke asazi ukuthi kungani engababizeli abaphurofethi babakhiphe,” kulandisa uMnu Dube.
UNkosazana Edith Ndlovu ongumalukazana kaMnu Moyo uthe kabakwazi ukuthi izindlu zitshiswa yini babona isisitsha kuphela njalo uzwa ubuhlungu ngoba kutsha lezakhe.
“Mina okungimangalisayo yikuthi sibona indlu isisitsha kodwa kungabonakali ukuthi itshiswe ngubani. Ngikhuluma nje kusukisela kumnyaka ophelileyo sokutshe izindlu ezine khonapho zisitsha emini. Okungizwisa ubuhlungu yikuthi kwatsha indlu yami khonapho mina ngingazi lutho ngomthuso (umuthi wokuthi izifuyo zande) lowo okuthiwa yiwo ozitshisayo,” kutsho uNkszn Ndlovu.
Ebuzwa ngale indaba uMnu Moyo uthe yena kalandofa wathi inkomo lezindlu ziqedwa yikuthi waphambanisa umthuso wenkomo awutshiyelwa nguyise.
“Mina kangilandofa abantu bangiqambela amanga kodwa okwenza ngiphelelwe yizifuyo lezindlu yikuthi ngaphambanisa ngakhunga umnawami ngenkomo mhla etshada sengikhohliwe ukuthi ubaba wathi nginganiki muntu wekhaya inkomo zami. Ngemva kwalokho ngazama ukuyayithatha umnawami wala layo wayithengisa.
“Yikho okwahle kwaqala khona ukufa kwenkomo zami lokutsha kwezindlu. Ngathi sengidinge abaphurofethi bathi akusalungi lutho ngoba ngaphambanisa umthuso engawutshiyelwa ngubaba. Ngikhuluma nje sengiphelelwe zinkomo,” kuphetha uMnu Moyo.
