uMthunywa
YiNtatheli kaMthunywa
UMGADLI weqembu leFC Platinum uWinston Mhango uthe ngendlela abadlala ngayo angeke kwehlule ukuthi baphinde umphehlo kunkezo yeCastle Lager kulisizini.
I-FC Platinum yizo intshantshu zanyakenye njalo khathesi indiza phezulu kwezinye kungalane. Kungumbono kaMhango ukuthi leliqembu lizayiphakamisa inkezo ngoba bafuna ukuyafinyelela kumqhudelwano weCaf Champions League.
UMhango ekhuluma esedolobheni leZvishavane ubikele uMthunywa ukuthi kuliphupho labo ukubuyisela inkezo ekhabothini.
“Angeke kwenze ukuthi sikhitshwe isinkwa emlonyeni ngoba ukukhokhela kwethu kuligi kuzaqhubekela phambili. Sifuna ukugcina inkezo ingeyethu,” kutsho lumdlali.
Umdlali lo uthe ngokuqina abayikho, izimbamgodi zizaloba imbali ngokuba liqembu lakuqala eliphuma eZvishavane ukugcina inkezo yeligi amasizini elandelana.
“Ukunqoba kwethu kuyasikhuthaza okuzwayo. Ithemba engilalo yikuzibona ngiyiphakamisa inkezo ngoMpalakazi. I-FC Platinum izaloba imbali ngokuba yintshantshu futhi.”
Uqhubeke wathi: “Ukuba seqenjini leFC Platinum kuyangikhukhumeza ngoba ithimu le isithole okunengi ngiyidlalela. Liqembu elisenhliziyweni yami. Angeke ngiyendawo. Khathesi inhlonso yami ikuqembu lesizwe.”
Kusizini yeCastle PSL yomnyaka odluleyo, umdlali lo utshibilike waba yinsika yethimu le eqede iyintshantshu yenkezo yeCastle njalo.
Ebuzwa ngokudlala kweqembu lakhe ngoLwesithathu, umqeqetshi uNorman Mapeza uthe iqembu lakhe likhangelele impumela enhle.
“Njengawo wonke amaqembu, sidlalela ukunqoba njalo sikufuna kuyo yonke imidlalo. Umbono wethu uphambili, yikuphumelela.
UMsekeli kaMapeza uLizwe Sweswe ufike kuleliqembu wathola inhlonipho yaphezulu nanko lokhe eqale umsebenzi, leliqembu liguquke laqina, lenelisa ukubutha inkezo.
USweswe ubevela kuqembu leTsholotsho alincedisa lafinyelela inkundla zePSL.
