uMthunywa
Lamuhla sizabuyela mbijana emuva siyekhuluma ngezihlanganiso. Kuyini isihlanganiso? Izihlanganiso ngamagama ahlanganisa imitshwana, yenze imitsho. Izihlanganiso azigcini nje ngokuhlanganisa imitshwana, kwesinye isikhathi kuqaliswa ngazo umutsho loba umutshwana.
Kwandile kumhloliso yesiNdebele kuhlelo ukuthi abafundi bangahlolwa kusihlanganiso lokubuza. Qaphelani bafundi ukuthi kuyenzeka kwesinye isikhathi lihlolwe kulezingxenye emhlolisweni wokuphetha izifundo zeviyo eliphezulu kuviyo lesine lelesithupha kumfundo ephezulu.
Sakhiwa njani isihlanganiso? Izihlanganiso esiNdebeleni kumbe esiZulwini singazehlukanisa kanje: Sikhuluma ngesiZulu nxa sikhuluma ngesiNdebele ngoba kulokuhambelana okukhulu phakathi kwalezindimi. Kwakuthiwa isiNdebele sithathelwa esiZulwini kwezinye izibanga.
Izihlanganiso zemvelo: kanti, uma, ngakho-ke, khepha, pho, lokho njalonjalo. Izihlanganiso ezithathelwe kwezinye incezu zenkulumo: kodwa, ukuze, ukuthi, ukuba. Siyakwazi futhi izihlanganiso sizehlukanise ngale indlela.
Ezingaguquli isimo sesilandiso esilandelayo futhi ezingelandaba lokuthi isenzo esilandelayo sikuyiphi indlela.
Eziguqula isimo sesilandiso esilandelayo sibe: sendleni eqondisayo yesimo, sendleleni eyamile/encikile. Lapha sicela ababalisi besiNdebele bancedise abafundi ngokubafundisa indlela zesenzo ukuze bazwisise le ingxenye yezifundo zohlelo lwesiNdebele!
Ukusetshenziswa (Izihlanganiso zemvelo) — Izibonelo: Isihlanganiso sihlanganisa imitsho: Uziphethe kubi. Uyakholwa. Uziphethe kubi kanti uyakholwa.
Isihlanganiso singaqalisa emtshweni: Uma engalibonanga iphutha lakhe lamuhla, ngeke aphinde alibone.
Sizakuma lapha lamuhla siphinde siqale lapha ngesikhathi esizayo.
