uMthunywa
Ethel Ncube
ZIYAJABUALA izakhamizi zeChipale, eBinga nanko phela isikolo seChipale Secondary sesiphiwe ilungelo lokuzimela uma kusiza ekulotshweni kwemihloliso okutsho ukuthi abafundi abaseyikuyabhalela imihloliso khatshana njengalokhu obekusenzakala.
Iphephandaba likazulu lake lakhipha udaba lwezakhamizi zeChipale lapho ezazikhonona ngokuthi ngesikhathi sokuyaloba imihloliso abafundi kwakumele bathuthe ngekhaya bayehlala eLusulu okuyindawo ekhatshana.
Kuzwakale ukuba ngemva kokulungisiswa kwesikolo lesi sesipasisiwe kungakho-ke asiseyikuba yi-annex kodwa sesizazimela sodwa.
UMthunywa uzwe ukuthi kulequla labezemfundo ebelivakatshele eChipale Secondary School ukuthi liyebona izakhiwo ezikhona kugoqela i-strong room lapho elifike lasuthiseka labika ukuthi isikolo lesi sesingazimela.
UMthunywa uxhumane lomunye wabazali uMnumzana Douglas Nyoni oveze ukuthi balokujabula okukhulu ngokwenziwe ngabezemfundo.
“Iqula elibona ngezemfundo lavakatshela isikolo sethu bafika babuka izakhiwo zethu basuthiseka ngakho sahle saphiwa i-station number ukuba sizimele sodwa. Khathesi esesikulindele yikuthi iZimsec ibuye izobona i-strong room yethu kodwa abogatsha lwezemfundo abazange bayisole okutsho ukuthi nxa kuhambe kuhle abantwana bazaqala ukubhalela lapha imihloliso ye Ordinary level kungasadingeki ukuthi baye eLusulu,” kutsho uMnu Nyoni.
Iphephandandaba likazulu libikelwe ukuthi abazali bebekhathazeka nxa sekufike isikhathi semihloliso ngoba kufanele badinge imali yokubagadisa besiya eLusulu.
Iphephandaba likazulu lixhumane lomgcinisihlalo wesikolo seChipale uMnumzana Jetro Mataga ochaze ukuthi kuliqiniso ukuthi isikolo sesithole istation number.
“Kuyasithokozisa ukuthi sesize saphumelela isikolo sethu sabhaliswa sazimela sodwa. Abantwana sebeyabhalela eduze ngoba i-strong room yethu kwathiwa yakheke kuhle. U-Education Officer watshela abazali ukuthi ngomnyaka ozayo abantwana bazaqala ukubhalela imihloliso yabo eChipale Secondary, lokhu kuyabe sekusiphumuzile ukudingela abafundi indawo zokuhlala eLusulu nxa sekumele babhale imihloliso,” kuphetha uMnu Mataga.
