uMthunywa
SINYUKA ngesivuvu isibalo samazwe ahlaselwe ngubhubhane i-coronavirus (Covid19) kusukela ngeSonto.
Angu-60 amazwe okubikwa ukuthi alabantu abahlaselwe yileli gcikwane emhlabeni.
Lokhu kulomthelela kwezokuvakatsha, ezomnotho, ukufunda, ukuya emasontweni lokuphila kwabantu nsuku zonke.
E-Australia laseThailand bekungokokuqala ngeSonto ukuthi kube labantu abatshonayo ngenxa yaleligcikwane.
I-Dominican Republic leCzech Republic bekungokukuqala kuqinisekiswa ukuthi kulabantu ababanjwe yileligcikwane elithelelwanayo.
E-Iran izolo abantu abatshonileyo ngenxa yaleli gcikwane bangu-54 okuyisibalo sokuqala esikhulu sabantu abake babulawa yileligcikwane esike saba khona kwelinye elizwe elingaphandle kweChina, okuyikho lolu bhubhane oluqale khona ezinyangeni ezintathu ezedluleyo. E-Iraq, Italy leSouth Korea bayanda abantu abangenwe yilumkhuhlane.
I-Egypt, i-Algeria, leNigeria ngamazwe ase-Afrika okuqinisekiswe ukuthi kutholakale abantu abalaleli gcikwane selokhu laqhamuka. Ukungenwa kwabantu base-Afrika yileli gcikwane kufake ingebhe lezinkomba zokuthi sekuseduze ukuthi leli gcikwane lisabalalele eNingizimu Afrika. Umuntu ongenwe yileligcikwane e-Algeria kubikwa ukuthi akakaze alubhade eChina, ubeye e-Italy.
Ithimba elibhekane leCovid19 eSouth Africa eliholwa nguNgqongqotshe wezeMpilo, uDkt Zweli Mkhize ngeSonto, lithe leli lizwe likulungele ukubhekana lalesi sifo nxa kungenzeka sihlasele. Kulesi sitatimende, umemezele ukuthi abantu abangu-151 beSouth Africa abaseWuhan leHubei bazaphenduka ezinsukuwini eziyisikhombisa kusiya kwezilitshumi. Lababantu abalalo igcikwane leCovid19. UMkhize umemezele lohlelo oluzalandelwa ukubaletha olokuhlolwa lokuqoqelwa kwabo endaweni eyodwa kuze kube lesiqinisekiso sokuthi abalalutho.
Babalelwa ku-87 000 abantu osekuqinisekisiwe ukuthi bangenwe yileligcikwane emhlabeni, balinganiselwa ku- 3 000 asebetshonile.
Lesi sifo saqhamuka eChina ezinyangeni ezintathu ezedluleyo. Izindawo leligciwane elilamandla kakhulu kuse Wuhan, leHubei.
Njengoba leli gcikwane lisabalala citshe zonke insuku, inhlanganiso yezempilo emhlabeni iWorld Health Organisation (WHO), ithe kukhona okungenziwa ngumphakathi okunganciphisa ingozi yokuhlaselwa yileli gcikwane.
Ku-website yayo ikhiphe amasu angasiza ekutheni ungangenwa yileligcikwane i-coronavirus.
Nanka amasu ongawasebenzisa ukuzivikela kulesi sifo:
– Geza izandla ngoketshezi lokugeza izandla olulotshwala loba usebenzise isepa, uhlikihle izandla.
Lokhu kuthiwa kwenzelwa ukuthi nxa likhona igcikwane ngesikhathi uhlikihla izandla life.
– Nanzelela ungathinti ikhala lamehlo ngoba izandla zithinta yonke indawo kungenzeka zithinte indawo elegcikwane bese ulifaka emzimbeni wakho ngazo izandla.
– Qhela ngemitha kumuntu okhwehlelayo loba othimulayo ngoba ngesikhathi umuntu ekhwehlela umoya awukhwehlelayo ungabe ulaleli gcikwane.
– Nxa ulomkhuhlane, hlala ekhaya ungayi endaweni lapho ozahlangana khona labanye abantu.
– Nxa usiba lenkinga yokuphefumula phanga ubonane lodokotela.
– Nxa usika inyama engaphekwanga lephekiweyo sebenzisa izitsha lengqamu ezehlukeneyo.
– Geza izandla ngaphambi kokuthi uthinte enye inyama uma usuqedile ukusika.
– Ungalokothi udle inyama yenyamazana ezifeleyo loba esiqedelwe ngoba sigula.
– Nxa usebenza ngenyamazana gqoka amagilavu amabhuzu nezimfonyo konke lokho ukushiye emsebenzini ungabuyi lakho ekhaya.
– Ungaluthathi uhambo nxa ulomkhuhlane, gwema ukusondelana labantu abakhwehlelayo ngesikhathi usohambeni.
– Nxa kunguwe othimulayo loba okhwehlelayo lahla iphepha obufinya ngalo, lilahle masinyane.
– Qikelela ukuthi ulilahla emgqomeni kadoti ovalekile.
– Izimfonyo zisetshenziswa uma uhlangana nomuntu olegcikwane iCovid19.
– I-WHO ithe kuyinto ejwayelekileyo ukuthi kube lokukhathazeka ngaleli gcikwane.
– Ithe nxa kumele uhlale ekhaya yenza njalo, abangane labathandiweyo xhumana nabo ngocingo noma nge-email.
– Iqhube yathi nxa uzizwa unengcindezi ungabonana nabeluleki bezengqondo kodwa ungaphuzi utshwala ngoba uthi uqeda usizi. — Ubulembu
