uMthunywa
YiNtatheli kaMthunywa
INKUNDLA yeqembu leHow Mine FC iyakhiwa kutsha kulungiselelwa imidlalo yePSL.
Inkokheli zaleliqembu zithi zibophe iqhinga lokuvuselela inkundla yazo ngoba azifuni ukuthi ithimu le idlale enzikini yakoBulawayo.
Inkundla yeHow Mine le iphakathi kwenkomponi yalumgodi njalo yiyo ebisetshenziswa kumidlalo yeDivision One nxa iqembu lisekhaya.
UManeja womgodi weHow Mine uPaul MacAndrew ubike lokhu emphakathini.
“Inkundla yethu izavuselelwa, kwakhiwe okuthile njengokufanele imidlalo yePSL. Sifuna ukunqoba kuyonale inkundla hatshi kweyinye indawo.
“Ithimu nxa isifike kulesi isigaba somdlalo kumele yenze yonke into ngobunono baphezulu. Amanye amathimu azabona ukuthi nxa sidlala enkundleni yethu siyabe siqine kakhulu.”
Ubike ukuba balethemba lokuthi kusiyafika phakathi laphakathi kwesizini inkundla izabe isilungiswe kwaphelela.
“Njengethimu kungumlandu wethu ukuthi silungise inkundla yethu isikhathi sokudlala singakafiki.
“Ukudlala enkundleni yethu kuzasinikeza umfutho wokunqoba. Kuzakuba yisipho njalo kubalandeli bethu abangakaze bebone imidlalo yenguqu yePSL.”
Izakhiwo ezizavuselelwa kwakhiwe kutsha ngezibalisela indlu yokutshintshela impahla, izihlalo zababukeli, indlu yentatheli labasakazi kanye lezambuzi.
Phambi kokuba inkundla yeHow Mine isetshenziswe kuligi ephakemeyo kumele ihlolwe yinhlanganiso yePSL.
Abalandeli bomdlalo bazakhumbula ukuba ngesizini ka ka2011, iqembu leFC Platinum lenelisa ukuvuselela inkundla yeMandava ngesikhathi esifitshane.
IMandava yiyo esiliguma leFC Platinum yona eyaphakamisa linkundla ingena kuligi yePSL okwakuqala.
