uMthunywa
Cornelius Luphahla
ISILILO sakoMthwakazi sokukhalela inkosi sesizwakele kwabaphansi kanye lakuMdali nanko phela inkokheli zomdabuko kanye lenkokheli kwezamasiko seziveze ukuthi ithole elifanele ukuthi lithathe isihlalo sobukhosi selitholakele.
Lokhu kuvezwe yinduna uMaduna Mafu ethunywe ngumdeni wakoKhumalo emkhosini wesikhumbuzo senkosi uMzilikazi obukhona ngoMgqibelo kuviki ephelileyo koMhlahlandlela lapho okwakulesigodlo sayo khona.
Ikhuluma emkhosini lo induna uMnumzana Vezi Maduna Mafu ubikele uzulu ukuthi inkosi yakoMthwakazi sokutholakele ukuthi izaphuma kuyiphi indlu yakoKhumalo njalo izavezwa emphakathini ngokusemthethweni.
“Ngikhuluma emphakathini ngithunywe ngabakoKhumalo ukuthi ngilazise ngokukhethwa kwenkosi yakoMthwakazi. Inkosi le bathe izakhethwa phakathi kwendlu kaLobhengula noma nje ngingeke ngiqambe ukuthi izakhethwa kuyiphi indlu yabantwabakhe.
“Nxa sokufanele sibikele uzulu ukuthi inkosi itholakale kuyiphi indlu njalo yiyiphi kuzenzakala lokho kodwa kwaziwa ngumdeni wakoKhumalo. Ngalokhu abantu kabahlale belindele ngoba isikhathi sokuthi babikelwe siyeza, khathesi kusalungiswa ngendaba le,” kutsho induna uMafu.
UMxhumanisi wenhlanganiso yeMthwakazi KaMzilikazi Cultural Association uMnumzana Rodgers Vuthuza Mthethwa ubikele intatheli ukuthi okwenza ubukhosi bube sendlini kaLobhengula yikuthi nguye owacina eyinkosi.
“Ukungasuki kobukhosi endlini kaLobhengula kuyinto enhle njalo eqondileyo sibili ngoba uLobhengula nguye inkosi yokucina lapha koMthwakazi. Kwathi ngemva kokuba inkosi ikhotheme kwahlala iminyaka emibili kungelankosi kucatshangelwa ukuthi uNkulumane uzaphenduka kumbe abonakale.
“Kuthe ngemva kwalokho uLobhengula wabekwa ukuba yinkosi wabusa okweminyaka engu-23 umbuso wakhe watshabalala ngemva kokunyamalala kwakhe sehlaselwa ngamaKhiwa. Ngalokhu-ke akuzange kwabakhona eyinye njalo inkosi ngemva kwakhe yikho ngithi kulungile ukuba ikhethwe endlini yakhe,” kutsho uMnu Mthethwa.
UMnu Mthethwa uqhubekele phambili njalo wathi bona njengenhlanganiso bakhuthaza ngokukhethwa kwenkosi kodwa kayisibo abayikhethayo.
“Thina njengenhlanganiso yeMthwakazi KaMzilikazi Cultural Association sikhuthaza aMaKhumalo ukuthi akhethe inkosi kodwa kayisithi esiyikhethayo, thina sikhangela kakhulu ngempilo kanye lenhlalo yenkosi uMzilikazi.
“Ngalokhu-ke sikhuthaza uzulu ukuthi inkosi ezakhethwa ayamukele njengokuba uMzilikazi kanye loLobhengula bemukelwa nguMthwakazi jikelele endulo,” kuphetha uMnu Mthethwa.
