uMthunywa
Yintatheli kaMthunywa
BAPHAKATHI kwetshe lembokodo abathengisa emigwaqweni edolobheni lakoBulawayo kulandela ukuthathelwa kwabo impahla abazithengisayo yikhansili yakoBulawayo ithi kabasuke ngoba bathengisa okungekho emthethweni.
Indaba yokuthathelwa kwabo impahla iqale mhlaka 1 Mpalakazi lapho abathengisi laba abathathelwe khona impahla ezinengi kakhulu yikhansili osokudale ukungena kwendlala kwezinye imuli eziphila ngokuthengisa.
UMthunywa ukhulumisane logogo uMendisi Tshuma ochaze ukuthi ubuhlungu ngokwenziwa yikhansili ngoba ibhidliza impilo zabo.
“Ikhansili yenza into embi kakhulu ngoba thina sinje siphila ngokuthengisa ngakho khathesi ngikhuluma nje angila ngitsho ukudla ngoba bangithathele impahla zami. Asazi ukuthi bathi siphile ngani njengoba umkhonomi welizwe bewubona ukuthi awumanga kahle,” kuchaza ugogo uMaTshuma.
Omunye wabathengisi laba uMnumzana Luckson Mleya ubikele intatheli ukuthi indawo abaziphiwa yikhansili ukuthi bathengisele kizo azibeneli.
“Noma nje ikhansili yasiqandela indawo zokuthengisela kodwa uhlupho yikuthi aziseneli ngakho asazi ukuthi ithi senzeni. Okunye njalo indawo lezi abathi sithengisele kuzo azilabathengi ngoba zikhatshana okusuka kudale ukuthi impahla zethu zingathengwa.
“Okubuhlungu yikuthi inengi lethu siphila ngokuthengisa angazi ukuthi njangoba sebesithathele impahla zethu bathi siphile ngani. Ngeqiniso ikhansili le ifuna abantu babe ngamasela ngoba akula enye indlela abangaphila ngayo.
Ngabe bayasilungisela ezinye indawo zokuthengisela ngoba lezi ezaphiwa abantu ezisemthethweni zilutshwana,” kutsho uMnu Mleya.
Iphephandaba likazulu lixhumane lomunye wabathengisi uMnumzana Melusi ochaze ukuthi lokho okutshiwo yikhansili abakuphikisi.
“Thina asiyali ukuthi siye endaweni lezo abazitshoyo kodwa uhlupho lapho abathi siyekhona kukhatshana labathengi, singayakhona akulamali esizayithola. Imali yokuthelela izindlu, ukuthenga ukudla lokubhadalela abantwana esikolo sizayithola ngaphi nxa sithathelwa impahla zethu zokuthengisa? Ngikhuluma nje ngithathelwe inqola yonke igcwele izithelo kungakathengwa angazi ukuthi abantwana bazalala bedleni namuhla,” kutsho uMnu Dube ekhuluma lentatheli uSodolobho wakoBulawayo uCouncillor Martin Moyo uchaze ukuthi abathengisi laba bathengisa ngendlela engekho emthethweni.
“Ngiyavuma ukuthi abathengisi laba bathathelwe impahla ngoba bathengisa ngokungekho emthethweni. Phezu kwalokho batshelwa kudala ukuthi basuke baye endaweni evunyelwe yiBulawayo City Council,” kuphetha uMayor uMnu Moyo.
