uMthunywa
Izinsuku zobunandi zasezithanda ukwanda lapha kuDumazile. Kusasa kwakuvuka kunguMoloi kusasa kuvuke kunguSithole. USithole laye wayeseqalile ukufika njalo lapha ekhaya ezobona indodana yakhe. UMtholephi wayengasayi ngakibo le eAdams ngoba uMaNzimande wayemthela ngamagama anzima kube ngathi wayesilwa loDumazile ngokwakhe kukanti ingane yayingazi lutho, zinjalo-ke indaba zesithembo, lapho kusilwa indlovu kufa utshani. USithole wayesezizwa ekhululekile ukuzifikela nje lapha koDumazile aze atshiye lemadlana ngelithi utshiyela ingane yakhe, ngezinye insuku amhambise lemsebenzini engelanhloni laye uDumazile ethembe elithi nguyise wengane yakhe.
Kwathi-ke ngemini eyisithutha uDumazile ehlezi echelesile loMoloi besidla kumnandi kunjeya njengoba laye wayemukelekile lapha ekhaya, wathutsha uSithole laye ngegunya lokuthi yindoda lapha ekhaya. Uthe nje ethi gaga wahle wasusa amanqe wakhwela phezu kukaMoloi ngelokumbulala. Kwaze kwathi lapho esebona ukuthi umoya wawusuhamba wakhona emyekela.
UDumazile-ke yena wayengasaziwa ukuthi wayengene kuwuphi umlindi.UMoloi esefunde isifundo sakhe sosuku waphuma waqonda emoteni yakhe lapho afika khona wazivalela njengoba nje abantu basebethe gwaqa begcwele iguma lonke bezobona umhlolo wamadoda.Babebabaza-ke ukuthi lokho babevele bekukhangelele ngendlela uDumazile ayesetshintshanisa ngayo amadoda lapha ekhaya. Inhloni zasezimuthe bhuqe eseze engathi uphambene lengqondweni lapha.Abantu basebecaphuke okwamagama sebefisa lokuthi babethola ithuba lokumtshaya uDumazile lo.
Ngosuku olwalandelayo UDumazile wabamba owangaphansi lapho esebona indaba yakhe igcwele iphephandaba.Yayinzima ngoba yayibethe ibizo likaMtalaselwa bhadla ukuthi nguye umnikazi muzi lapho amadoda ayephose abulalelana khona, iphephandaba laze lakubeka sobala lokuthi wayengekho ekhaya ukuze aphose elakhe ngensindabaphenduli eyayehlele emzini wakhe lapha. Isiga sendaba lesi senzakala nje egumeni lapha lezingane zikhangele, zazisala zisiba yizingane ezinjani pho emva kokubona into efana lale?
Zafika indaba zephephandaba kuMtalaselwa owaphuthuma ngesomvundla elubhekise ekhaya, lapho athola khona kutshaya umoya. UDumazile wayethethe umhlaba khefu wenyanga engekho ngitsho lasemsebenzini. Izingane zazitshiywe loLeratho indodakazi yakhe. Wayengakukhangelelanga lokuthi uSandile wayeyingane eyayidinga ukunakekelwa. Unembeza yiyo into eyayingekho lapha kuye ngitsho, njengomuntu owayehlala ezicabangela yedwa yikho ayekwenza.
