uMthunywa
Ngibotshiwe ngenzeni?
KHULU: Sabona. Ngingubaba oleminyaka engu-27. Ngidinga usizo. Ngathandana lentombazana yazithwala kodwa angizange ngiyithathe. Yaqala ukukhuluma kubi ngami ngasengiyala. Ngemva kwalokhu ngahlangana lomunye kodwa senginanzelele ukuthi ngibotshiwe angisenelisi ukuhlangana lowesifazana. Ngidinga usizo lokhu kwenzakala ngo2009. Mina ngisebenza eGoli.
Impendulo
Indaba yokubotshwa kowesilisa yindaba esegudwini. Kudingakala mzukulu ukuba ubone abanye okhulu kumbe abadala bakunikeze izihlahla zesintu ezilakho ukuba zikukhulule kuhlupho lwakho lolu. Kakuqali ngawe, kuvamile ukuba obaba bahlangane laloluhlupho. Ungahlangana labadala balakho ukukupha izihlahla ezingakukhulula mzukulu. LaseGoli khonale bakhona abangakuhlenga ukuze ihloka lakho libe lakho ukugamula futhi.
Umkami lomunye usisi. . . ngiyasola
KHULU: Ngicela ungilamulele. Nansi indaba. Ngihlala losekabantwana, lapho esiloja khona kulomunye njalo usisi olojayo ongelandoda. Khulu umkami losisi lo bayezwana osekungenza lami ngingasazwisisi ngoba lemali bayabolekana mina ngingakwazi. Khulu ngiyiphathe njani lindaba ngoba mina kangizwisisi ukuthi bazwana njani kuze kufike kulesi isibanga sokubolekana imali. Umkami ngingambuza uthi bangabangane kodwa isimanga yikuthi sifika endlini le babengathi abazani.
Impendulo
Lokhu kubonisa ukungathembeki komkakho. Nxa kungaba nguwe olobungane lowesilisa ohlala endlini khonapho engezwa njani yena. Akulunganga ukuba owesilisa athi ulobungane lowesifazana nje, baze babolekane imali. Khuluma laye umkakho, umbonise ukungakhululeki kwakho ngalesisimo osengene kuso lalo untombazana. Ungabona ungakhululeki futhi kungakuhle ukuba lisuke liyehlala kwenye indawo ukuze lingacithi umuzi wenu likhangele.
Usefuna ukunakekela umntanakhe
KHULU. Linjani? Ngamithiswa yindoda ethetheyo ngomnyaka ka2005 kodwa ngesikhathi sithandana sasingekho serious. Yena wayehlala eGweru mina ngihlala koBulawayo. Khulu ngathi sengibelethile ngamtshayela ucingo ngimtshela kodwa kazange azihluphe ngokuzobona umntwana. Lokufona wayengafoni ukuthi abuze ukuthi umntwana unjani. Umntwana useleminyaka elitshumi kakaze amthengele sona isiwiji nje. Khathesi usesithi usefuna ukunakelela umntanakhe. Kambe ngingabe ngiphambanisile nxa ngingathi kangifuni khulu, ngoba lubaba wayevele engafuni kuzwa ngomntanami?
Impendulo
Mzukulu nxa uhlangana nje lomuntu wesilisa emacansini ungazi okwenzayo njalo ungazimiselanga ngaye kwenza impilo yakho ibesesilaheni njalo uzifaka ebunzimeni. Kulilungelo lomntwana wonke ukuba akhule eloyise njalo esazi uyise. Kubonisa ukuba kazange amale umntwana lo ngakho ulelungelo lokwenza konke akufunayo ngoba nguyise phela mnikeze ithuba lokondla ingane yakhe
Kafuni ukuthi ngithume idombo
Khulu: Ngilethemba uphilile futhi ngikufisela impilo enhle ende njalo. Khulu ngilenkinga ngilomfazi kangikamveleli. Nxa ngimtshela ngisithi ngifuna ukuthuma idombo ngakibo uyala. Khulu kangisakwazi ukuthi ngenzeni ngicela ungibonise mntomdala.
Impendulo
Iqiniso mzukulu yikuthi, lumuntu ohlala laye kakabi ngunkosikazi wakho, ngoba awukamveleli njalo ukuhlala laye kanje yikumumatha ingozi enzima ongeke uyimele kusasa. Nxa kungenzeka ingozi uzayibika kubani? Kuyadingakala ukuba umbuzisise uzwe ukuba kungani esala. Nxa ungasuthiseki kuhle ukuba ubone izihlobo zakhe uzilandisele ngohlupho lwenu. Yizo ezizaba lakho ukukhuluma laye ngale inkinga. Nxa eqhubeka esala kutsho ukuthi akula muzi kungabe udlala ngawe nje kuphela. Kuhle ukulungisa lokhu kuselesikhathi sibili. Nxa kungalungiseki lezihlobo zakhe kuhle ukuba lawe wazise ezakho izihlobo eziseduze njalo kungabe lokhe kungalungiseki hatshi geza izandla mzukulu kulukuba ugagadlele ingozi ezakuhlupha kusasa
Kangigeziswanga ngenzeni?
Khulu: Ngicela izeluleko kuwe kangilabo obabakazi. Ngabhujelwa ngubaba wabantwana kunyanga ezimbalwa ezedlulileyo njalo kangizange ngigeziswe. Mina kangilalo ukholo engilulandelayo. Okungenza ngikubhalele yikuthi impilo yami kayisahambi ngendlela engifisa ngayo. Khulu ngingathi ngiphila ephutshweni. Ngicela ukubuza ke Khulu ukuthi ukungageziswa kwami yikho yini okungabe kubangela ukudideka kwami empilweni? Ngicela izeluleko ngikhathazekile.
Impendulo
Indlela imfa ebanjwa ngayo ekupheleni iyangesiko labantu mzukulu. Nxa ungakholelwa ekugezisweni ngentelezi kungakho ungakwenzi kuhle ukuba wenze lokho okholelwa kikho. Kuhle ukuba wenze lokho okholelwa kikho. Banengi abantu abaziphilela bengabambanga lutho ngemva kokufelwa, okutsho ukuba lawe ulakho ukuziphilela. Isikhathi esinengi umuntu uthi engabasenkingeni kube labantu abanengi abaletha inkulumo ezidanisa ingqondo njalo lawe zivikele kokunjalo. Kungani abanye balenkolo yokuba kuyagezwa izandla ngentelezi umakusukwa ematheneni njalo abanye abagezi kodwa sonke siphila okufananayo. Ukudideka kungaba kusenziwa yisigaba sokufelwa osuka kiso kodwa ngokuhamba kwesikhathi ulakho ukuhlambuluka ingqondo ubone ikusasa yakho.
