uMthunywa
YiNtatheli kaMthunywa
IZIQHOLO zeZhwane, iTsholotsho FC ziyathokoza njengoba sekusele amalanga ambalwa ukuthi ziphenduke kunkundla zeligi ephakemeyo eyeCastle PSL.
Umqeqetshi walithimu uLizwe Sweswe ubike ukuba ukhangelelwe ukuthi akhethe abadlali bakhe abangamatshumi amathathu kuliviki.
USweswe uthe iqembu lakhe alitshintshanga kodwa uzayengeza ngokusayina abadlali abasakhulayo abanengi ngenjongo yokuthi abumbe iqembu elizadlala lindawonye okwamasizini amathathu alandelayo.
“Siyilindile iligi yeCastle. Amalungiselelo aqhuba kakuhle njalo ngifuna ukuthi kusiyaphela iviki leli sengikhethe ithimu yabadlali engikholwa ukuthi bazasinikeza imklomelo.
“Inkuthazo esilayo ngevela kubasekeli bethu ukuthi sinqobe, senqabele ukuxotshwa kuligi. Okuthabisayo yikuthi sibatholile abadlali ebesibafuna. Ungakhangelisisa, iTsholotsho FC ayizange izihluphe ngokuthenga abadlali labo okuthiwa balodumo. Sizadlalisa abafana esasilabo,” kutsho uSweswe.
Umqeqetshi lo uphezulu kokufundela isithupha seCaf A njalo uqine ngokutshayela ihlombe inkokheli labanikazi beTsholotsho FC ngosekelo abamnika lona.
Kusenjalo, ikhansili yakoBulawayo isinikeze iqembu leTsholotsho imvumo yokuthi iqhubeke isebenzisa inkundla yeWhite City njengekhaya layo.
