uMthunywa
YiNtatheli kaMthunywa
UBONGANI Mafu uthe uyazi kamhlophe ukuthi amehlo abasekeli beHighlanders asethe mpo kuye. Kukhangelelwe ukuthi acacise ithimu le ukuze inkazimulo iphenduke njalo eMagumeni.
Kulandela ukudliwa yiCaps United ngeSonto edluleyo, uMafu ulethemba lokuthi abadlali bakhe bazanqoba.
“Abafana bafundile labo ukuthi kumele baphakamise umdlalo wabo. Mina njengomqeqetshi ngiyakubona ukuthi badlalela ukunqoba.
“Ngiyazi ukuthi abanengi abakakholwa ukuthi ithimu iqinile. Imidlalo iyeza, abalandeli bazazibonela.”
Kusenjalo, uMthunywa ukhulume loNdumiso Gumede umaqhuzu weqembu, oveze ukuthi ithimu abalayo okwamanje yiyo ezaphendukisa injabulo koBulawayo.
UGumede ubike njalo ukuthi abasweli buthongo ngokwehlukana lomqeqetshi uMark Mathe osekuCaps United ophenduke koBulawayo wafika wayangisa iHighlanders ngokuyinqoba 2-1.
Umaqhuzu lo uthe uMathe nguye owalahlekelwayo ngokwehluleka ukungena kuBosso njalo kumele abekwazi ukuthi ithimu le yiyo eyamphakamisayo.
UMathe ngumsekeli kamqeqetshi weMakepekepe okwamanje.
UGumede uthe ukunqotshwa yithimu eqeqetshwa nguMathe akumangalisi ngoba bona njengeHighlanders bathembele kubadlali lakumqeqetshi wabo uBongani Mafu.
UMathe, loba esekuCaps United wayewufuna ngamehlo abomvu umsebenzi kuHighlanders.
UGumede uveze ukuthi akekho omunye umqeqetshi ongcono ngaphandle kukaMafu.
“Akula ongcono kuloBongani [Mafu]. Aluba ukhona ngabe saqhatsha yena. Uyabona ke uMathe samkhukhumeza. UMathe wayengomunye wethu njalo akumangalisi ukuthi ubuye wasinqoba. Kunjalo kunguqu, kodwa-ke thina siqina ngethimu esilayo okwakhathesi. Le yiyo ithimu esihamba ngayo.”
UGumede uncome kakhulu uMafu ngomsebenzi asewenzile kuqembu.
