uMthunywa
YiNtatheli kaMthunywa
IMPI yenkululeko kunye loZibuse wakuleli kwandise ukuthi nxa kukhulunywa ngakho kukhunjulwe amaqhawe angena iganga ayakulwa lamasotsha eRhodesia. Kodwa-ke bakhona abanye ababeqakathekile ngesikhathi sempi, labo ababesemakhaya labo abadlala indima enkulu ekulwiseni umbuso wabacindezeli.
Ukuzinikela kwabo labo lakho kwaphathisa kakhulu kumpi yenkululeko.
Enye ingcitshi kwezembali, uTerence Ranger uchaza ngokuqakatheka kwama-pungwe ayesibakhona ezigabeni, abantu belala behlabela ingoma zombusazwe besola umbuso wabelungu. Ukuhlabelela lokubandawonye kwabansundu kwakutshengisa ukubambana kwabo.
Umlondi wembali uNgwabi Bhebhe uthi ama-pungwe la ayesenziwa, ayelomutsho omkhulu ngoba kulapho ababesabelana khona ulwazi lokuxhasa abalweni benkululeko ngokuhlabela ingoma ezibapha idlabuzane. Ukuya kumbuthano le kwakufaka impilo zabo engozini ngoba lapho babehambisa ukudla, bebalungisela indawo zokuhlala babuye babaphe amazwi okubaqinisa.
Imizi yabo yayisiba yindawo ephephileyo yokucatshela ibutho leRhodesia.
Ngokunjalo izakhamizi zancedisa kakhulu kumpi yenkululeko yelizwe ngokudla, indawo zokuhlala kunye lolwazi. Abalweli benkululeko babethola ukudla okuphekwe kuhle futhi okutshisayo emakhaya, yikho nje sisithi labo bangamaqhawe enkululeko yeZimbabwe.
Izakhamizi zaziphathisa njalo ngokunika abalweli benkululeko ulwazi ngokuthi ibutho leRhodesia liqonde ngaphi, lokhu kwakuncedisa ukuthi bakwazi ukuba bahlasele besuka kuluphi uhlangothi.
Okunye njalo babencedisa langemithi lokubagezisa izilonda, babesenza konke okusemandleni abo ukuthi babancedise.
Abazange badela lobanje labo bukhona ubunzima ababehlangana labo lapho, babehlukunyezwa, bethathelwa izifuyo zabo betshiselwa imizi, bebulawelwa izihlobo kodwa abazange badele, baqhubeka bencedisa ngokuzimisela okukhulu. Lokhu kutshengisa ukuthi inkululeko yeZimbabwe kayilethwanga ngamaqhawe ayesempini wodwa kodwa ngitsho lomphakathi wadlala indima enkulu ekutholeni uzibuse.
Lokhu kutsho ukuba imisebenzi yabo layo idinga ukunanzelelwa elizweni lonke jikelele. Ngoba yibo ababelala behlabela benika abalweli idlabuzane, bebapha ukudla lendawo zokuhlala.
