uMthunywa
Anorld Ndlovu
ABALANDELI beBosso sebeveze ukudana ngemva kokulahlekelwa ngomunye wabo, uPrince Ncube obesaziwa enkundleni yeBarbourfields ngelithi “Ndwangu”.
UNcube ufe ngemva kokuwa enkundleni le ngesikhathi ebukele umdlalo weBosso leqembu leShabanie Mine mhlaka 15 Mabasa.
Ekhuluma lephephandaba likazulu, omunye wabalandeli beBosso uThabani Ncube uthe njengabalandeli beqembu badabukile kakhulu ngokwehlele imuli yakoNcube kanye labalandeli beBosso.
“Okwehlele imuli yakoNcube kubuhlungu sibili njalo njengabalandeli beBosso lathi sikhala ndawonye lemuli yakoNcube ngoba silahlekelwe ngumlandeli weqembu omkhulu obehlala ezithokozela maviki onke nxa iqembu lidlala.
“Ingozi le eyehlele uNdwangu isiphambanisa umnyaka omuhle esilawo lonyaka njengabalandeli ngoba iqembu lisadlala kuhle okuyinto esesileminyaka sayicina.
“Sithi kalale ngoxolo uNdwangu wethu weBosso,” ngamazwi kaThabani la.
Omunye njalo umlandeli okhulume lentatheli uSmiso Dube uthe ingozi le isibavule amehlo njengabalandeli ukuthi nxa bezosekela iqembu basekele benanzelela ukuthi abazifaki engozini.
“Ingozi le eyehlele umfowethu ebesilandela laye Amahlolanyama imbi kakhulu ngoba ibingayehlela loba ngubani ngakho singabalandeli beqembu kufanele sihlale sibonisana ngokuthi sisekela iqembu singekho engozini,” kuchaza uDube.
UPrince Ncube obeleminyaka yokuzalwa engu-49, ubelisotsha enkambeni yeLookout Masuku Barracks, ubhubhe ngoLwesihlanu mhlaka 27 ngemva kokuwa ensimbini alimale enkundleni yeBarbourfields ngesikhathi ebukele umdlalo weBosso leShabanie.
UPrince “Ndwangu” Ncube ubekwe ngoMvulo kuyonale iviki.