uMthunywa
Ethel Ncube
KULEQEMBU labomama bakuWadi 5 eNtabazinduna eselisungulwe iphurojekithi yokubhaka ngenhloso yokuzithuthukisa impilo zabo kanye lesigaba sakibo.
Iphurojekithi yeSiphiwo sethu isungulwe kumaviki amathathu adluleyo njalo ilamalunga angu-15.
Omama beSiphiwo sethu babhaka izinkwa, amabhanzi bethengisela izakhamizi kanye labezitolo eziseduzane.
Ekhuluma loMthunywa uMgcinisihlalo wephurojekithi le uNkosazana Elizabeth Khumalo uchaze ukuthi njengeqembu labomama bazimisele ukusebenza gadalala.
“Sibone kufanele njengabomama ukuba singahlaleli izandla kodwa ukuthi sisukume siqale umsebenzi wezandla wokubhaka ngoba lumsebenzi sikhangelele ukuba usincedise kakhulu ekuziphiliseni.
“Asilasikhathi eside siqalile ukubhaka kodwa imali esayithola ekubhakeni sathenga ngayo impahla zokusebenzisa emsebenzini wethu njalo sikhangelele ukuba siqhubeke silokhu singezelela impahla yethu,” kuchaza uNkszn Khumalo.
“Ilunga linye ngalinye lakhipha imali engange R100 le$10 yakhonapha ukuze siqalise iphurojekithi yethu le,” kubika uNkszn Khumalo.
Uqhubekele phambili esithi bazimisele ukuyaphambili baze bavule isitolo sabo njengabomama.
“Khathesi yisikhathi esinzima sokulima emasimini kodwa lokho akutsho ukuthi ibhizimusi lokubhaka sokumele lime. Sizabe sitshintshana ekwenzeni lokhu siphanane amalanga ukuze wonke umuntu aphatheke kulokhu njalo abadonsela emuva sizababeka eceleni thina siqhube sisiyaphambili.
“Amabhanzi sibhaka angu-200 ngelanga kuthi izinkwa zibhaka ezilitshumi. Okwenza sibhake izinkwa azinlutshwana yikuthi kazithengwa njengamabhanzi. Amabhanzi esiwabhaka ngelanga ayaphela wonke.
“Sikhangelele ukuba sikhule siyephambili sicine sesihambisa endaweni ezinengi ezitshiyeneyo ezifana lezikolo lasezitolo ezinkulu,” kuveza uNkszn Khumalo.
UMthunywa ubuye waxhumana lelinye ilunga lale iphurojekithi uNkosikazi Beauty Qongo ochaze ukuba bazimisele ukusebenza nzima ukuze baphakamise izimulu zabo.
“Akumelanga nxa ungumama ulindele imali kababa kumele lawe usukume uphandele imuli kungakho ukubhaka lokhu kuzasincedisa ukuthi lathi senelise ukuthengela abantwabethu amabhuku lokubabhadalela imali zesikolo lokwenza okunye okutshiyeneyo.
“Okufunekayo yikuthi abantu bakhuthalele into abayenzayo njalo bazimisele ekusebenzeni kwabo kuncediswane umsebenzi ubelula,” kuveza uNkkz Qongo.
Ekhuluma lentatheli uKhansila wakule indawo uBekithemba Qongo uveze ukuba ufisa ukuba omama bangabuyeli emuva.
“Ngifisa ukuba njengoba sebeqalile ukubhaka omama bangavilaphi njalo bengadonseli emuva kodwa baqhubekele phambili ngoba iphurojekithi le ilusizo kuzimuli ezitshiyeneyo.” kuphetha uKhansila Qongo.
