uMthunywa
Thokozile Mbedzi
ZIKHATHAZEKILE izakhamizi zeColliery Low Density, eHwange ngendwangu okubikwa sezithwalise nzima izakhamizi ngokuzithathela ukudla kanye lokuhlala zigijima phezulu kwezindlu zazo.
Kubikwa indwangu lezi esezilamaviki ambalwa zigcwele endaweni le zingathola imnyango ivuliwe ziyangena ezindlini zithathe ukudla.
Ekhuluma lentatheli kaMthunywa uNkosazana Lubelihle Dube uthe bathwele amagabha avuzayo ngendwangu esezigcwele ilokitshi lonke.
“Sesihluphekile silapha, kasisakwazi ukuthi senzeni ngoba ukuphila lenyamazana akulula.
“Indwangu zakhona zingathola iminyango ivuliwe ziyangena ezindlini zithathe ukudla. Uthola endlini sokusesabeka ngoba ziyabe zidonsa okunye kuchitheka.
“Ngaphandle kwalokho, kwesinye isikhathi ziyabe zigijima phezulu kwamazenge kucine kungahlaleki ngomsindo,” kutsho uNkszn Dube.
“Sicela ababona ngenyamazana zendle basincede bazixotshe lapha ngoba ilanga lithi liphuma lazo ziyabe sezikhona sezingcwele yonke indawo.
“Indwangu lezi ziyadelela futhi abantu abangomama labantwana abancane ngoba zingababona bephethe ukudla ziyabahluthunela zibaleke ziyokudla zihlezi phezulu kwezindlu.
Isikhulumi seZimbabwe Parks and Wildlife Management Authority (Zimparks) uMnumzana Tinashe Farawo uthe indwangu ziyabe zidinga ukudla.
“Indwangu ziyabe zidinga ukudla, ngakho uzulu kaxwaye umkhuba wokuzipha ukudla ngoba nxa zingakuthola ngamahlandla atshiyeneyo zilakho ukuqhubeka ziphenduka zizolanda ukudla.
“Lokhu yikho okuzenza zicine zijayela ukutshona zibhoda endaweni. Abantu kabafunde ukuthi bangabojikela ukudla endaweni zonke nje kodwa kabaqoqe ingcekeza ukuze ithwalwe ngabayithwalayo.
“AbeKhansili labo kabathwale amabhimu ngesikhathi esiqondileyo ukuze indwangu lezi zingajwayeli ukuba zithola ukudla endaweni lezi.
“Izakhamizi zingabhekana lohlupho lolu kazibikele abeZimparks ukuze babaphathise zingakaxhwali kakhulu,” kuphetha uMnu Farawo.