uMthunywa
Cornelius Luphahla
SEZIPHELELWE ngamasu izakhamizi zelokitshini leCowdray Park koBulawayo nanko phela kungakapheli inyanga undofa obehlupha elokitshini leli efile usephinde wavuka futhi.
Undofa lo okubikwa ukuthi ubehlukuluza abesifazana emacansini, etshontsha ukudla ezindlini zabantu kanye lokujikijela abantu ngamatshe emgwaqweni kubikwa useqalisile ukuhlasela futhi abantu.
Undofa lo ngemva kokuvuka kwakhe kasatshayi nje ulomuntu phansi nanko phela kuviki ephelileyo uvale umgwaqo wezimota libalele ngokujikijela abantu ngamatshe kulo umgwaqo.
UMthunywa ukhulumisane lomunye wezakhamizi zakule indawo uNkosazana Moreen Dube oveze ukuthi undofa lo ubejikijela abantu ngamatshe emgwaqweni etshaya izimota.
“Undofa lo uqale ukujikijela amatshe emgwaqweni eduze lesikolo seMahlathini Primary ngoLwesine ngemva kweviki ephelileyo. Kwathi kusemini ligwaze umhlaba ngabona abantu ababehamba emgwaqweni bebaleka ngapho amatshe ekhithika esihlahleni se-gumtree esikhulu.
“Isimanga yikuthi phezulu kwalesisihlahla kwakungelamuntu kodwa bekuzwakala izwi lomuntu elifana xathu lelikandofa lo, uErnest lisithi khona bezabatshaya abantu,” kuveza uNkszn Dube.
Esinye njalo isakhamuzi sakule indawo uNkosazana Sibonile Moyo ubikele intatheli ukuba ukuvuka kukandofa lo akumangalisanga ngoba wazikhulumela ukuthi uzavuswa ngomunye wakhe.
“Mina ngathi ngisizwa kuthiwa uEarnest sevukile angizange ngethuke ngoba ngamuzwa ebulawa ngabaphurofethi esithi bangaze bambulale akulandaba umngane wakhe uBridget uzamvusa. Ngakho ukuvuka kwakhe lokhu yikugcwaliseka kwamazwi akhe,” kuchaza uNkszn Moyo.
Ekhuluma lentatheli uMnumzana Gilbert Ndlovu uchaze ukuthi ukuvuka kukandofa lo kubenza bapike begqoke ezabo.
“Ngizwa ubuhlungu kakhulu ngokuvuka kukandofa lo, uErnest ngoba sezaqala futhi ukulala lamakhosikazi ethu.
Angazi ukuthi ngenzeni kumbe ngithuthe kule indawo ngiyohlala ekhaya ngoba ngabaleka eNkulumane 5 ngibalekela undofa khathesi sengihlutshwa ngomunye njalo ngapha,” kutsho uMnu Ndlovu.
Imizamo yokukhuluma loKhansila wakule indawo yehlule.
