uMthunywa
Langelihle Moyo
INHLANGANISO ye-Livestock Production Development isixwayise abalimi abafuye inkomo zochago ukuthi bananzelele ukuthi basengela endaweni ezihlanzekileyo ukuze kuvikelwe imikhuhlane etshiyeneyo.
UMnumzana Cosmas Muzunde onguDairy Officer kunhlanganiso le esabelweni seMatabeleland North uthe umlimi kumele abone ukuthi lapho asengela khona yindawo ehlanzekileyo engasoze icine iphambanise uchago oluyilo olumenza abe lebhizimusi emileyo.
“Kuqakathekile ukuthi umlimi aqinisekise ukuhlanzeka kwendawo yakhe yokusengela nxa efuna ukuqhuba kuhle ibhizimusi yakhe yochago ngoba imikhuhlane iyamemetheka lasendaweni zokusengela,” kuchasisa uMnu Muzunde.
Eqhubekela phambili uthe kulemikhuhlane ehlasela inkomo zochago ebangela ukungaqhubi kuhle kwebhizimusi. Imikhuhlane le igoqela iMastitis kanye le-Contagious abortion.
Inkomo zochago
“Nxa isifuyo sihlaselwe ngumkhuhlane we-Mastitis uchago lwayo luyabe lungasalungelanga ukudliwa ngabantu ngoba umkhuhlane lo uyingozi ebantwini. Lokhu kudala ukuwa kwebhizimusi. Ngokunjalo ngithanda ukukhuthaza abalimi ukuthi bavikele inkomo zabo emikhuhlaneni we-Contagious abortion.
Ungezelele wathi umkhuhlane weContagious abortion ubangelwa ngamagcikwane atshiyeneyo atholakala endaweni zokusengela, ngakho-ke kuqakathekile ukuthi abalimi bagcine indawo zabo zokusengela zihlanzekile.
Nxa isifuyo sesihlaselwe ngumkhuhlane lo siyabe singasehlisi futhi ubangela ukuphunza loba ukuthi inkomo izale ithole elingaphilanga kuhle,” kulandisa uMnu Muzunde.
Uthe umuntu engadla uchago olusengwe enkomeni ehlaselwe ngumkhuhlane lo ulakho ukuba lawo.
“Kuqakathekile ukuthi abalimi baqinisekise ukuhlanzeka kwendawo abasengela kuzo, njalo lokuthi bahlolise uchago lwabo ukuze bathole usizo lokuvikela izifuyo zabo emikhuhlaneni lo,” kuphetha uMnu Muzunde.
