uMthunywa
Durban — UVEZE izindaba ezitshaqisayo umfundisi webandla leNongoma, enyakatho yeKwaZulu-Natal, iHealing Hour, othandazela amatshe abesewathengisela abadinga ukwelatshwa enkingeni zabo.
NgoLwesihlanu iphephandaba le Ilanga lixoxe lomfundisi Saziso Ndwandwe (35) — esesontweni lakhe ebeligcwele abantu abebeyothenga lamatshe — obecacisa ngetshe lakhe elitsha alithengisa nge-R1 000 athi lisiza osomabhizimusi ukuthi imisebenzi yabo ihambe kuhle. Uveze ukuthi usekhiphe inqwaba yezidumbu zabantu abadukisa abantwana bakaNkulunkulu, ebasa kogoqanyawo ngomthandazo langamatshe akhe ezimanga.
Ubekutsho lokhu engelanhloni.
Uthi usazoqhubeka ngokwenza lokhu uma izinyanga zingayekelii ukudukisa abantu zibaqola itshe lemali, zibathembisa izinto ezingekho.
Usethengisa ilitshe lika-R1 000 nje, phambilini ubethengisa elibiza u-R30 athi belisiza ukubethela lokuxosha imimoya emibi ekhaya.
“Sengibulale inqwaba yabantu phakathi kwabo kukhona lezinyanga ezidukisa abantu bakaNkulunkulu ngisebenzisa lamatshe ami. Ngiqale ngiyexwayise inyanga uma sengizwile ukuthi idlala ngabantu ngaphambi kokuba ngiyibulale.
Ngizixwayisa ngokuthi maziyekele lento yokufuna izimali ezitshisiwe ebantwini zibathembisa ukuthi bazanotha zizabatholela lemisebenzi. Uma ngibona ukuthi inyanga kayifuni ukulalela, ngithandazela amatshe ukuthi mawayibulale. Akubi yisikhathi eside ngizwe ngabantu sebengixoxela ukuthi kayisekho emhlabeni. Ngisebenza ngomthandazo, ngathunywa nguMdali ukuba ngizophilisa abantu bakhe emhlabeni, ngiqede lokuhlupheka, ngakho uma kukhona ophikisana lezindlela zikaNkulunkulu kumele afe. Ngiyasincamela isigebengu esitshontshayo kulenyanga ngoba zona zidlala ngabantu zifune izimali ezinkulu zibe zazi kahle ukuthi ngeke zibasize,” kutsho uNdwandwe.
Uthi uma kufike umuntu olamadlozi ebandleni lakhe, uyamthandazela amnike itshe elikhulekelwe “kuphume yonke le nto esuke imhlasele”.
Utshele Ilanga ukuthi la matshe uwalanda ezindaweni eziningi ezahlukeneyo. Uthi kawagcobi lutho, uyawabusisa nje kuphela bese enza izimanga kwabathengileyo. Utshele Ilanga ukuthi utshelwa nguMoya Ongcwele ukuthi awalande ngaphi amatshe azophilisa abantu bakhe (uMoya Ongcwele).
“Lemali engilithengisa ngayo kayisuki emqondweni wami kodwa nguMoya Ongcwele ongiyalela ukuba ngibize limali. Banengi abahlale bezongibonga ngokuthi libasizile, bangitshele ukuthi bebelezinkinga emizini yabo kodwa banele bathenga itshe lokuphila babethela ngalo konke sekuhamba kahle,” kusho u.
Uthi abagulayo uyabathandazela ngitsho ocingweni basinde ngenxa yamandla amakhulu awaphiwa nguNkulunkulu.
UNkosikazi Thoko Mkhwanazi-Xaluva ongusihlalo weCommission for the Promotion and Protection of the Rights of Cultural, Religious and Linguistic Rights Communities, uthi okwenziwa nguNdwandwe kwehlisa isithunzi sabafundisi njengoba ezincoma ngokuthi usekhiphe inqwaba yezidumbu.
“Kungani enza ibhizimusi ngomthandazo? Kawukho umbhalo eBhayibhelini othi umuntu uma edinga umthandazo kumele abhadale. Thina sazi ukuthi umthandazo kawuthengiswa,” kutsho uNkkz Mkhwanazi-Xaluva.
