uMthunywa
USESABA ngitsho ukuyochitha isizungu ezitolo ezehlukahlukeneyo eGoli umdlali weKaizer Chiefs, uLucky “Sherrif” Baloyi.
Amakhosi asetitinywe imidlalo emithathu ilandelana. Anqotshwe yi-Orlando Pirates nge 2-0 kuLast 32 yeNedbank Cup e-FNB Stadium, eSoweto, eGoli, kwathi kusabatshazwa lesi sibhaxu aphinda adliwa futhi yiPlatinum Stars nge 2-0 kowe-Absa Premiership ngempelaviki edluleyo.
I-Asec Mimosas yase-Ivory Coast ihlikihle usawudo esilondeni seChiefs nge 1-0 emlenzeni wokuqala kumkhankaso wokuqala weCaf Champions League.
UBaloyi uthe kunzima empilweni yakhe kulezi zinsuku njengoba Amakhosi ephikwa ngumdlalo.
“Njengamanje kunzima ngitsho ukuya e-mall ngoba uzothi uyahamba uhlangane labalandeli bathi siyahlulwa wena uyakholisa. Ngitsho lalapho uhlangana labo emgwaqweni bakhuluma kabi. Abanye bathi abadlali abathize abahambe,” kutsho uBaloyi.
“Umdlalo webhola unjalo kodwa ngoba singabadlali abagijima esigabeni esikhokhelayo kumele sibhekane lokunjalo. Indlela yokushintsha konke lokhu yikuthi sinqobe. Abalandeli bafuna ukubona iqembu linqoba. Nxa singanqoba ngeke basihluphe kanje. Siyakuqonda ukudinwa kwabo ngoba bafuna impumela. Lathi sizimisele ngokujika izinto. Asidlali kabi kodwa inkinga yethu asiwasebenzisi amathuba alula okuhlohla amabhola.”
“Siyabacela abalandeli ukuthi basisekele. Abekho abantu esibadinga njengabo kulesisimo esibhekene laso. Impumela emihle izoqhamuka. Wonke amaqembu ayabhekana lesimo lapho etshaywa khona ngesizini,” kutsho uBaloyi.
Amakhosi asephuthwe yisicoco seMTN 8, Telkom Knockout neNedbank Cup. Lakuligi abukeka esephumile embangweni ngoba asele kude kuMamelodi Sundowns ekhokhelayo.
Ngempelaviki iChiefs izolibangisa e-Ivory Coast ukuyodlala umlenze wesibili ne-Asec Mimosas. — Ubulembu
