uMthunywa
Nkosilathi Sibanda
KUMINYAKA elandelayo ubukhosi bePremier Soccer Laegue buzaphathwa nguPeter Dube. Lokhu kuzenzeka nxa amathimu wonke akuligi le ezavotela umgcinisihlalo weHighlanders lo.
NgoMgqibelo uDube ucela ukuthi inkokheli zamathimu alitshumi lasithupha amethembe ukuthi nguye kuphela olakho ukuphakamisa inguqu.
Umgcinisihlalo weTshilamoya lo uzancintisana loKenny Mubaiwa oweDynamos. Amadoda womabili la asevuselele impi ephakathi kweDynamos leHighlanders loba nje ngalesi isikhathi sekubangwa amavoti.
Okwenza uDube angene ukhetho olokuzethemba yikuthi kulisizini kulamathimu amanengi aphuma emhlubulweni ongezansi yelizwe. Amavoti kaDube asegcekeni ngaweTsholotsho, How Mine, Border Strikers, Hwange, FC Platinum leBulawayo City.
UDube uthe uyazi ukuthi ngemva komhlangano, nguye ozaxhawulwa ngoba esephiwe ubukhosi kuPSL.
“Zonke inkokheli esizibiza ngokuthi ngama-governor zithembisa ukuthi zizangivotela. Sikhumbule njalo ukuthi ama-governor la yiwo ebengisebenza lawo ngisesengumsekeli kamgcinisihlalo wePSL. Bayazi sobala ukuthi ngingumkhokheli osebenzela wonke umuntu,” kutsho uDube.
UDube wayephakathi kwequla lenkokheli zePSL ebisa usekelo lweCastle Lager, inkezo yeNetOne leyeChibuku.
Ubika ukuthi imbali yakhe engumsekeli weligi imbeka phezulu okuyikhona okumenza abe lesiqiniseko sokuthi uzakubangumgcinisihlalo.
“Ubukhokheli obuhle yilobo obubatshazwa ngumuntu wonke. Angithi nxa ukhokhela inhlanganiso kumele wazi ukuthi ukuphumelela kwayo yikusebenzelana labantu kuhle. Yikho engakwenza ngisasengumsekeli kamgcinisihlalo kuPSL. Nxa sengiphethe isihlalo sikamgcinisihlalo ngizaqhubeka ngisebenza lomuntu wonke.
