uMthunywa
Thokozile Mbedzi
LITSHONE sezilikhalele inina lesigabeni seTarusenga eMasvingo elanyamalala losane lukamakhelwane walo olulenyanga ezine kuviki ephelileyo.
Kubikwa uTariro Mahorasha oleminyaka engu-30 obetshontsha usane lukaPrisca Chime oleminyaka engu-22 ocatsha kusukela mhlaka 4 Mfumfu ngehola lika-9 ekuseni ubotshelwe eJerera, eMasvingo.
Kuvele ukuba uTariro ubeseqile enye indoda wayitshela ukuthi usane lolu ngolwayo njengoba wayeke wayiqambela amanga ukuthi uzithwele umthwalo wayo.
Ekhuluma lentatheli kaMthunywa uMnumzana Hloniphani Nsingo uthe kalankani ngesenzo sikaTariro yena obesethole umgodi wokukhuthuza enye indoda.
“UTariro usimangalisile silapha, ubeseqile enye indoda wayitshela ukuthi umntwana ngowayo njalo ibisimnika imali.
“Kukhanya ubeqambele indoda le amanga wathi ukhulelwe waya ngakibo lapho afika waba ngumngane loPrisca Chime, unina wosane kanti konke lokhu kwakuliqhunga lokuthi amjwayele amtshontshele umntwana,” kulandisa uMnu Nsingo.
Isikhulumi samapholisa esabelweni seMasvingo ulnspector Kudakwashe Dhewa ebuzwa ngodaba lolu uthe solufikile ehofisini labo ngakho luzakuya emthethwa ndaba.
“Udaba lwenina elitshontshe usane solufikile ehofisini lethu ngakho luzakuya emthethwandaba maduze nje,” kuphetha ulnsp Dhewa.