uMthunywa
YiNtatheli kaMthunywa
UMPHATHINTAMBO wogatsha lwezemfundo yangaphansi laphezulu uDokotela Lazarus Dokora usexwayise ababalisi ukuthi bangaqali ukutshaya abafundi ngoba ozatholakala ekwenza uzathoniswa ajeziswe.
UDkt Dokora ukhulume lokhu kumbuthano wabazali kanye labakhokheli bezikolo ezingu-576 esabelweni seNkabazwe eGweru.
Uthe incwadi egcizelela umthetho lo isendleleni.
“Ukutshaya abafundi ngokwakudala. Ngiyacela babalisi lingabatshayi abafundi, ngoba nxa ungatshaya umfundi abazali bakhe bayebikela abomthetho uzakuyathonisiswa.
UDkt Dokora uthe ngenxa yendlela yokufundisa entsha esikhona (new curriculum) ekhuthaza ukuthi abantwana bahlale behlolwa ukuze babonakale ukuthi balolwazi olunganani akusela sizatho sokuthi abafundi batshaywe.
“Indlela entsha yokufundisa esikhona kayifuni bafundi abangamavila kumbe abngaziphathanga. Ababalisi bona umsebenzi wabo yikubona lapho umfundi ehluleka khona lalapho enelisa khona.
“Kuviki ephelileyo bengibala udaba oluphume kwelinye iphephandaba umphathisikolo obencenga abazali bomntwana amtshayayo ukuthi besule icala leli,” kuchasisa uDkt Dokora.
UMphathintambo lo uqhubekele phambili ekhuthaza ababalisi ukuthi baqhubeke behlolisisa abafundi ngoba lokhu kuyindlela yokubalungiselela imfundo yaphezulu.
Uthe inhlelo zemfundo entsha zizakwenza ukufunda kube lula ngoba abantwana abancane beEarly Childhood Development (ECD) bazafundiswa ngolimi abaluzwayo.