uMthunywa
YiNtatheli kaMthunywa
INANI labantu asebebanjwe umkhuhlane weCovid-19 lifike kunkulungwane mhlaka 14 Ntulikazi kulel njalo labo asebedlule emhlabeni sebengu-19.
Lo owokucina obhubhileyo kubonakale ukuba ubelomkhuhlane lo ngemva kokuhlolwa kwesidumbu sakhe.
Kubikwa sekulabantu abangu-1 034 asebebanjwe igcikwane leCovid-19 kuleli.
Kusitatimende esikhutshwe lugatsha olubona ngezeMpilakahle kanye lokondliwa kuhle kwabantwana ngoMvulo kubikwa kulabantu abangu-49 abatholakale belomkhuhlane weCovid-19 abangu-28 ngabavela kweleSouth Africa kuthi abangu-21 ngabangazange bake bavakatshele kwamanye amazwe.
Phakathi kwabangu-21 abangazange bavakatshele kwamanye amazwe, abangu-7 bakhona kubikwa bake basondelelana labanye abagulayo abakuleli.
“Kusenziwa inhlolisiso yokudingisisa ukuthi abanye abangu-14 bangabe belithethe ngaphi igcikwane .
NgoMvulo mhlaka 13 besekulabantu abangu-343 asebesilile kumkhuhlane lo.
UMqondisi jikelele wenhlanganiso yeWorld Health Organisation uDokotela Tedros Adhanom Ghebreyesus kumhlangano womhlaba lentatheli obekhona ngoMvulo lapho obekukhulunywa ngesimo somkhuhlane weCovid-19 uthe igcikwane le-corona liqhubekela phambili liyisitha soluntu esihamba phambili.
“Igcikwane leli liqhubeka liyisitha esikhulu soluntu njalo injongo yalo yikuthi lithole abantu engabahlasela.
“Kungakho kuqakathekile ukuthi abantu balandele izimiso zabezempilakahle zomphakathi ezigoqela ukugeza izandla, ukugqoka izifinyo, ukukhwehlelela endololwaneni kanye lokuhlala ngekhaya nxa ungezwa kuhle. Wonke umuntu ulomlandu njalo nxa sonke singenza okumele sikwenze singenqabela ukumemetheka kwegcikwane leli,” kuchasisa uDkt Tedros.
