uMthunywa
YiNtatheli kaMthunywa
IZAKHAMIZI zesigabeni seTinde, eBinga ziphathekile ngemisebenzi etshiyeneyo yokulungiselela okubhula isivuno sabo samabele.
Kubikwa esigabeni lesi izilimo ezincane ezifana lamabele lenyawuthi yizo ezenza kuhle.
UMthunywa uvakatshele kule indawo kuviki ephelileyo lapho axoxisane lamanina ambalwa akhulume ngamalungiselelo abawenzayo okuqala umsebenzi wokubhula.
Inina likhipha amabele esiphaleni
UNkosazana Betty Sibanda obesinda lapho azabhulela khona ubikele uMthunywa ukuthi baxwayiswa ngabalimisi ukuthi baqale balungise indawo lapho abazalungisela khona amabele abo ukuthi angangcoli.
“Sengileminyaka embalwa ngibhulela lapha kodwa minyaka yonke ngingakabhuli ngiqala ngisinde ngibe sengisusa amabele esiphaleni sengiwafaka lapha.
Delta Beverages
“Lokhu ngikwenzela ukuthi amabele ami loba sengiwabhulile angaze aba lenhlabathi ngoba acina engathengiseki loba engawokuzidlela,” kutsho uNkszn Sibanda.
Uqhubekele phambili wathi ukusinda lokhu kwenza amabele akhe abe ngawonhlonzi lwaphezulu ngoba ayabe efakwe endaweni ehlanzekileyo njalo engekho manzi.
“Abalimisi basixwayisa ukuthi amabele ethu akumelanga ahlale endaweni elobumanzi ngoba lokhu kubangela ukuthi akhunte isivuno sicine sisehla.
“Amanye amabele esiwalimayo siyawathengisela inkampani yeDelta Beverages yona esibhadala imali enhle kakhulu,” nguNkszn Sibanda lowo.
UMthunywa uphinde njalo waxoxisana loGogo uMaSibanda obebize omakhelwane ukuze bamncedise ukubhula amabele oveze ukuthi lokhu baqala ukulandela izixwayiso zabalimisi umsebenzi wabo usuhamba kuhle.
“Ukusinda lapho esibhulela khona sikwenze kuviki ephelileyo kule iviki siqala nje ngokuthanyela sibe sesifaka amabele ethu siwasusa esipheleni siwabhule andubana siwele sibe sesiwafaka emasakeni.
“Ngikhuluma nje sengilamasaka ayisithupha esiwabhule kuyonale iviki. Ngikhangelele ukuthi ngithole amasaka angafika i-30 ngoba ngiwatshayile sibili amabele emasimini lonyaka,” kulandisa uGogo uMaSibanda.
UNkosazana Loveness Mwembe obemncedisa ukubhula amabele uphethe ngokuthi ukuvuna kunye lokubhula amabele kabasakutshayi ndiva ngoba sebafundiswa ngabalimisi be-Agritex indlela eqondileyo yokukwenza engenzi balahlekelwe yisivuno sabo.
