uMthunywa
Cornelius Luphahla
IZAKHAMIZI zesiqinti seZimbili esigabeni seMzingwane sezivuse inkophe nanko phela sezisungule iphurojekithi yokufuya inkukhu ngenhloso yokuzithuthukisa kanye lengqubela phambili.
Iphurojekithi le esungulwe yizakhamizi ezinhlanu ezingaphansi kukaSobhuku uMlungisi Nyathi iqale kuwonalo umnyaka.
UMthunywa uvakatshele kulesisiqinti wakhulumisana loMnumzana Mlungisi Nyathi umgcinisihlalo wale iphurojekithi wachaza ukuthi inkukhu abazifuyayo ngezesikhiwa.
“Iphurojekithi le siyisungule kuwonalo umnyaka ngenyanga kaMabasa. Ekuqaleni sasifuya inkukhu zemakhaya kodwa khathesi sesifuya ama-broiler.
“Njengoba iphurojekithi yethu isacathula khathesi inkukhu esilazo zingu-500 ngakho isifiso sethu yikuthi sengezelele kunani leli ensukwini ezizayo,” kuchaza uMnu Nyathi.
Esinye njalo isakhamuzi esikule iphurojekithi uNkosazana Simangele Ndlovu uchaze ukuthi iphurojekithi yabo itshengisa ukuthuthuka.
“Iphurojekithi yethu iyathuthuka mpela nanko phela khathesi sesifuya ama-broiler. Ensukwini ezizayo sikhangelele ukuthi sifuye lenkukhu zamaqanda.
“Okunye njalo sikhangelele ukufuya imvundla ngenxa yokuthi balutshwana abantu abayifuyayo njalo ilentengo ephezulu,” kutsho uNkszn Ndlovu.
UMthunywa ubuye njalo wakhulumisana loNkosazana Winnie Moyo omunye wezakhamizi ezikule iphurojekithi wabika njalo ukuthi inkukhu zabo bazithengisa koBulawayo.
“Inkukhu zethu khathesi zisasezincane ngoba zilamaviki amathathu. Ngakho sikhangelele ukuthi nxa sezikhulile sizithengisele koBulawayo kanye lakwezinye izakhamizi,” kuphetha uNkszn Moyo.
