uMthunywa
Nkosilathi Sibanda
IHIGHLANDERS kungenzeka ukuthi itshibilikelwe ngabadlali bayo bakudala uLawson Nkomo, uArnold Ndiweni loRyan Mabhena bona okubikwa beseduzane lokuphiwa izivumelwano ezintsha yileliqembu.
UMthunywa uzwe ngokugcweleyo ukuba bobathathu laba baphakathi kwequla labadlali asebemelele imvumo yomqeqetshi omutsha uErol Akbay.
UAkbay nguye ozabumba iqembu kubadlali abahlanganiswe ngumsekeli wakhe uAmin Soma-Phiri lomqondisi wabaqeqetshi uCosmas Zulu.
Umbiko ophuma enkambeni yeBosso uveza ukuthi ithimu le idinga umdlali ozatshibilika esemuva esandleni sokudla lomunye ozavimba ephakathi.
UNkomo engathola ithuba enkundleni njengoba kunguye yedwa odlala egijimela esandleni sokudla. Ngaphandle kwalokhu, uNkomo ulethalenta lokusebenza njengemvimbi aphinde ayephambili kwenkundla.
Umdlali lo usuke kuBosso ngomnyaka odluleyo esiya kuqembu leBantu Rovers.
Ukuphenduka kukaNkomo, uMabhena loNdiweni kuqinisa amazwe enkokheli zeBosso athi lonyaka abasoke bazihluphe ngokuthenga abadlali abatsha.
IBosso ikhethe ukuthi iphakamise abadlali bayo abatshibilika kuqembu labasakhulayo lokusebenza lalabo abake badlalela iqembu.
Umaqhuzu uNdumiso Gumede Dube uvezele intatheli wathi sebediniwe ngokudlalelwa ngabathengisi.
“Asifuni abantu abazathi befika lapha bedlale okwesikhatshana.
“Abadlali abanjalo balande ukuzodiliza lokwakha amabizo. Sesizwile ngabantu abanjalo.
“Kuqembu lama-juniors silabo abafana abatshibilika kakubi. Kulabo ababevele bekuHighlanders kudala kodwa abasuka, bazamelela umbono kamqeqetshi uAkbay. Kuhle ukuthi sisebenza labo abafuna ukuphenduka,” kutsho uGumede.
Kusukela iBosso yaqala ukulolonga ngoZibandlela, kugijima abadlali ababekhona kuqembu elesizini edluleyo kanye lehlekana lalabo abaphakanyiswe bephuma kumathimu abasakhulayo ama-Under-19.
Zinengi ingcitshi zabadlali ezifisa ukungena kwezikamagebhula kodwa zivalelwa phandle ngoba kuthiwa akulamali.
