uMthunywa
Khanyile Ndebele
INHLANGANISO ebona ngezokulima eyeAgritex isixwayiswe abalimi ukuba benqabele ukusebenzisa imvundiso yomhlabathi elamakhemikhali ngendlela engaqondanga ukuze bavikele izingozi ezingaba khona.
Imvundiso le, elamakhemikhali igoqela iNutrifol, iSasa, iEnact, iQuick growth kanye le Ammonium Nitrate.
UNkosikazi Stella Rombe ongumlimisi koBulawayo esebenza eAgritex uthe abalimi bengasebenzisa imvundiso yomhlabathi ngendlela engaqondanga kuba lengozi ezithile ebantwini, kunyamazana, ezilinyweni kanye lasemanzini.
“Imvundiso elamakhemikhali nxa ingasetshenziswanga ngendlela efaneleyo umhlabathi uyafa.
Kwesinye isikhathi lezinyamazana lazo ziyafa.
Inyoni kunye lenyosi ezibuya emalubeni ezilimo ukuzohlanganisa impoko lazo ziyafa.
“Umuntu angabamba izilimo lezi ezifafazwe imitshana le ulakho ukufa.
Kukanti izulu lingana kugelezele emanzini asehlangene lamakhemikhali kuyafa inyamazana ezihlala emanzini ezifana lenhlanzi njalo kufe lalezo ezinatha kuleyondawo,” kulandisa uNkkz Rombe.
Uthe amanzi angaphansi komhlabathi lawo alakho ukungcoliswa ngamakhemikhali omvundiso ngoba kungenzeka angene ngaphansi komhlabathi aye empandeni zezilimo.
Uqhubeke waveza indlela umlimi angenqabela ngayo lokhu.
“Okwakuqala umlimi angakwenza ukuvikela ukuphambaniseka komhlabathi yikuthi angafaki imvundiso elamakhemikhali kodwa asebenzise umquba wenkomo.
“Okwesibili abalimi abangakwenza yikufafaza imvundiso yamakhemikhali emahlamvini ezilimo ikakhulu ezingamahlamvu ezifana lekhabitshi.
“Okunye okumqoka okungenziwa ngumlimi yikuyahlola umhlabathi ukuba ufuna umvundiso onjani ukuze umlimi enqabele ukusebenzisa umvundiso oyikhemikhali ongavumi emhlabathini wakhe,” kutsho uNkkz Rombe.
Uphethe ngokuthi okuyisiqokoqela yikusebenzisa imvundiso engamakhemikhali ngendlela olaywe ngayo ngabalimisi.
