uMthunywa
Ncekwenhle Ncube
ABALIMI sebekhuthazwe ukuthi basebenzise i-biogas ukuze bathole amandla okudonsa amanzi emigodini yabo okuthelela izilimo.
Ekhuluma labalimi abebebuthene emkhosini wokubuka amasimu eMjayeli Farm kuviki ephelileyo, umanjinela wenhlanganiso yezokulima kuleli, uMnumzana Bright Chizadza ukhuthaze abalimi ukuthi basebenzise i-biogas ukuthola amandla okudonsa amanzi emigodini yabo.
“Ngensuku lezi isimo somnotho singathi asimanga kuhle, ngithanda ukuthi ngikhuthaze abalimi ukuthi basebenzise i-biogas ukuze benelise ukuzuza amandla okudonsa amanzi ezifuyo kanye lokuthelela emigodini yabo.
“I-biogas le siyithola kungcekeza yonke ekhona ngokuyivalela okwebanga elithile kungangeni umoya (oxygen) kube lelanga elilutshwana. Kuba lokusebenza kakhulu kwezibungwana esingeke sazibona kuphume umoya we-methane le-nitrone oxide ongafunakaliyo kusale i-biogas eyiyo efunakalayo.
“Ukusebenzisa lo umhlobo wamandla kuqondile kakhulu ngoba akuduli njalo akupheli nxa uqathanisa lamagetsi alezi insuku adulayo njalo aphelayo. Lokhu kungenxa yokuthi i-biogas le iswelakala kuphela nxa kungasela ngcekeza,” kuchaza uMnu Chizadza.
Ubuye njalo wagcizelela ukuthi le indlela itshiphile kakhulu ngoba kusebenza kakhulu umquba kanye lamahlanga atholakala ezinsimini zabo abalimi kanye lasezibayeni zabo.
UMnumzana Ndabezinhle Ndlovu ongufolomani ensimini kaMjayeli ugcizelele kakhulu ukuthi lo umhlobo wamandla uyaphathisa kakhulu ngoba besebenzise wona ngesikhathi beqhuba inhlelo zokulima kanye lokudonsa amanzi ezifuyo.
“Silapha nje lathi sadonsa amanzi sisebenzisa i-biogas le. Ayiduli njalo kayipheli njengeminye imihlobo yamandla.
Abalimi kabasondelele abalimisi babancedise indlela abangasebenzisa ngayo lolu uhlobo lwamandla,” kubika uMnu Ndlovu.
Abalimi babikelwe njalo ukuthi i-biogas ayiduli ngoba ilula ukuyibeka njalo kudingeka imali encane ukuqalisa okwenza kubelula ukuthi noma ngubani ayiqalise ngoba ubulongwe benkomo eyodwa buyenelisa ukusukumisa isibane esisodwa.
