uMthunywa
Cornelius Luphahla
ABEZOKUZITHOKOZISA esabelweni seMatabeleland kanye lakoBulawayo sebesungule inhlanganiso yabo ezabona ngamalungelo kanye lokubathuthukisa emisebenzini yabo.
Inhlanganiso le entsha igoqela abaculi, abalingisi bezemidlalo kanye labalobi ibizwa ngokuthi yi-Web of Love Arts.
Inhlanganiso le izancedisa amalunga ayo ukuthi angacindezelwa njalo izabona ukuthi bayathola usizo lokuthi bathuthuke emisebenzini yabo.
UMthunywa ukhulume lomabhalane waleliqembu uRueben Mpofu ochaze ukuthi bona njengenhlanganiso bajonge ukuthuthukisa abakwezokuzithokozisa esabelweni seMatabeleland kanye lakoBulawayo.
“Inhlanganiso le siyisungule ngoNcwabakazi ngomnyaka ka2014 ngakho khathesi sesilamalunga adlula 50 njalo amanye amaqembu ayathembisa ukuba zingxenye zalinhlanganiso.
“Khathesi ihofisi yethu iseHloseni Arts Centre eduze leBulawayo Theatre edolobheni lakoBulawayo. Injongo yethu yikuthuthukisa amalunga ethu onke ngoba bakhona abaleziphiwo zokuhlabela kumbe ukubhala kodwa besehlulwa yikuswela imali yokuzithuthukisa ngakho thina sikhangelele ukubancedisa ukuze bathuthuke,” kutsho uMnu Mpofu.
UMqondisi waleliqembu uThomeki Dube ubike ukuthi okwadala ukuthi basungule inhlanganiso le yikuthi bafuna amalungelo abo ahlonitshwe.
“Okwenza sabumba inhlanganiso yethu yikuthi sananzelela ukuba inengi lethu aliphathwa ngendlela enhle liyahlukuluzwa ngakho sikhangelele ukukuqeda lokhu.
“Lokhu sikubona ngokuthi abanye abantu bayamema abaculi kumbe imbongi ukuba zizobakholisisa kodwa ekucineni babancitshe imali ababathembise yona. Okunye njalo kuvame kubalobi ngoba bayaloba imibhalo yabo kuthi abantu bayitshontshe bayithengise ngentengo ephansi okuyikho okuwisa abalobi.
“Ngalokhu-ke sikhangelele ukuthi wonke amalunga ethu avikelwe kulokhu kuthi umuntu obenza lokhu abotshiswe ukuze ilungelo labaculi linanzwe,” kutsho Dube.
Uqhubekele phambili njalo wachaza ukuthi okunye bajonge ukuba bancedisane ukuthuthukisa ezamasiko ngendlela zonke.
“Okunye njalo njengenhlanganiso sijonge ukuthuthukisa ezamasiko ngoba kulula ukuba sikwenze lokhu nxa sibambene. Abalobi sikhangelele ukuthi balobe besekela ezamasiko, abaculi, imbongi, abadwebi labo benze njalo ukuze sithuthukise amasiko kaMthwakazi,” kuphetha uMnu Dube.
