uMthunywa
Musa Janga
AMAPHOLISA akoBulawayo aseveze ukuba kulezinye izigelekeqe eziphatheke kudlakela olube khona kuviki ephelileyo esezisiyaphephela emaphandleni ngenxa yokuba sezithungathwa umkhondo wazo ngamapholisa.
Kuviki ephelileyo kuqhamuke udlame endaweni ezinengi zelizweni njalo kube lezigilamkhuba ezigqekeze ezitolo zatshontsha okwehlukeneyo okubalisa impahla, ukudla, kukanti abanye babetshiya betshisile lezo zitolo.
Isikhulumi samapholisa koBulawayo uChief Inspector Siphiwe Makonese ubike ukuthi amapholisa azama ngazo zonke indlela ukuthi balandele abantu abatshontsha ezitolo.
“Emadolobheni yikho okubelomsindo khona. Abantu kabalelwa ukutshengisela kodwa kumele kwenziwe ngokuthula hatshi ukuthi abantu bacine betshontsha lokutshisa izitolo. Emaphandleni bekuthule ngakho abantu labo abaganga emadolobheni batshontsha impahla sebebalekela emaphandleni lapho obekulokuthula besiyacatsha khona.
“Kulojaha uNsikelelo Sibanda oleminyaka yokuzalwa engu-23 owatshontsha ikhuba eNtumbane Complex koBulawayo ubanjelwe eNyathi ebaleke esuka koBulawayo. Ubotshwe ebhasini esiya eNyathi. Ubeyisibonelo sokuthi banengi asebabaleka bayacatsha emakhaya,” kulandisa uChief Insp Makonese.
Ubuye wathi emigwaqweni eminengi sokulamapholisa asehlola amabhasi ukuze kubonakale ukuthi akulanto etshontshiweyo ephakathi.
“Labo abafuna ukubaleka besiya emakhaya bazabajwa ngoba sekulamapholisa emigwaqweni eminegi ayabe emisa amabhasi ehlola ngakho silethemba lokuba banengi abazabanjwa.
“Lokhu okwenziwe ngabantu bekuyibusela akuhambisani lemithetho yelizwe, thina njengabomthetho kumele senze isiqiniseko sokuthi abantu abenze lokhu bayajeziswa,” kuphetha uChief Insp Makonese.
