uMthunywa
Cornelius Luphahla
IZAKHAMIZI zesigabeni seMatshakayile, eLupane zicelana intolwane ngendaba esegudwini yokufa kwenkomo zesinye isakhamuzi sakule indawo mahlayana nje okucatshangelwa ukuba kwabangelwa yinyanga esasithandana layo sasesiyala, uMthunywa ukuzwile lokhu.
Isiga lesi senzakale kunyanga ephelileyo lapho uMnumzana Gibson Mangena ofelwe khona zinkomo ezingu-16 ngemva kwamalanga amabili kuphela okudale ukuthi adinge abaphurofethi abamtshele ukuba uTshaka usekhaya.
UMthunywa uxhumane lesinye isakhamuzi sakule indawo ecingweni uMnumzana Nqobizitha Ndlovu olandise indlela inkomo zikaMangena ezazisifa ngayo.
“Lokhu ngathwetshulwa yingwe angikaze ngikubone ukufa kwenkomo okunjeya. Inkomo leziya zazisifa ngendlela emangalisayo ngoba wawubona inkomo iphuma kwezinye igijima ifike iqunte umkhawuzane ngemva kwalokho iqonde emanzini igijima njalo ifike inathe iqede iwele phansi kube yikuphela kwayo.
“Kwathi kusiyatshona ilanga sokufe inkomo eziyisikhombisa, elakusasa lathi litshona sezingu-16 ezifileyo. Asazi ukuthi kwangena sifo bani enkomeni lezi,” kuchaza uMnu Ndlovu.
Ekhuluma lentatheli uNkosikazi Cleopatra Mangena onguye owafelwa zinkomo uchaze ukuthi ubuhlungu ngokufa kwenkomo zakhe njalo uyazi ukuthi kulomuntu olesandla kulokhu.
“Ngibuhlungu ngokufa kwenkomo zami kodwa ngiyazi ukuthi zabulawa ngenye inyanga yePupu uMaNgwenya eyayithandana lomkami wathi esehlukana layo kunyanga ezimbili ezedluleyo yabheja yathi uzabona. Ngemva kwalokho kwaqala ngokufa inkukhu ngathi yebo ngikubonile, kwathi sokusifa inkomo ngahle ngazi mhlophe ukuthi yikho okwatshiwo yinyanga leyo ukuthi sizakubona,” kuchaza uNkkz Mangena.
UNkkz Mangena ubuye njalo wachaza ukuthi ngemva kokufa kwenkomo lezi wahamba kubaphurofethi.
“Ngathi ngibona sokufe inkomo ezingu-7 langa linye ngavuka ngisiyadinga abaphurofethi ngathi ngiphenduka ngathola sezingu-16 esezifile. Ngemva kokulungisa kwalaba baphurofethi akuzange kwafa ezinye futhi sokuze kulamuhla,” kutsho uNkkz Mangena.
Usobhuku wakule indawo uMnumzana Josphat Ncube ubikele intatheli ukuthi ulokudana okukhulu ngalesisiga.
“Ngilokudana okukhulu ngesiga esehlele isigaba sami njalo ngiyaqala ukubona into enje. Baqinisile sibili ukuthi kungabe kulomunye umuntu owagangayo emzini kaMangena ngoba ngeke kwenzakale into enje mahlayana nje,” kuphetha uMnu Ncube.
Imizamo yokukhulumisana lesangoma okubikwa ukuthi yiso esabangela ukufa kwenkomo zikaMangena yehlule.
