uMthunywa
Ethel Ncube
BASELE bethithibele abazali kanye labantwana abafunda esikolo seSipane eKezi kulandela ukutholakala kokhomane luthe qithi phambi kwamakilasi lugcwele indiwo, impondo kanye lamalembu amadlozi, uMthunywa ukuzwile lokhu.
Isiga lesi senzakala ngeviki ephelileyo lapho omunye umbalisi othe esiya ezindlini zokufundela wabona ukhomane luvalwe ngamalembu amnyama phambi kwamakilasi.
Ekhuluma lentatheli omunye wabazali bakule indawo olilunga lekhomithi yesikolo uMnumzana Albert Ndou uveze ukuba bamadolonzima ngewombela le.
“Lokhe sisadidekile ukuthi kwenzakalani eSipane sekuvela ubuthakathi esikolo. Impendulo siyaziswela njalo kukhanya ngumuntu owatshiya impahla yakhe ayesiyaloya ngayo, akukho okunye.
“Ukhomane lolu lwalugcwele impondo, indiwo, amalembu, okunye lami angikwazi ukuthi ngingakubiza ngithi kuyini,” kulandisa uMnu Ndou.
“Ukhomane lolu salubona ekuseni, asazi ukuba lapha esikolo lwabekwa sikhathi bani? Sikhathazekile kakhulu ngempilo zabantwabethu ngoba impahla efana lale akumelanga ibonakale ezikolo. Okunye okusikhathazayo yikuthi ngezinto ezaziphakathi kukhanya ukhomane lolu lugadwa ngabathakathi ebusuku,” kubika uMnu Ndou.
Ekhuluma lentatheli omunye wababalisi uveze ukuba ababalisi abafundisa kulesisikolo sebesesaba ukuhlala kuleyo ndawo.
“Thina njengababalisi sesisesaba lokuhlala esikolo nxa sokubonakala impahla enje esikolo. Ukhomane lolu umnikazi kazakali kodwa inkokheli zesigaba zihle zalutshisa,” kuphetha umbalisi lo.
