uMthunywa
Mthokozisi Dube
INHLANGANISO ebona ngezemidlalo kumfundo yaphansi iNational Association of Primary Heads isibike ukuba inengi lababalisi liwuthathela phansi umdlalo we-volleyball kungasi ukuthi aliwuthandi kodwa kuyikuthi alizwisisi imithetho yomdlalo lo.
Ekhuluma lentatheli umsekeli kamgcinisihlalo uNkosinathiMoyo weNaph ubike ukuba inhlanganiso yakhe izaqhuba uhlelo lokuhlomisa ababalisi ngomdlalo lo izikolo zisanda kuvulwa.
“NjengeLupane District, kulemidlalo eyenza singenzi kuhle emncintiswaneni ngoba kubangelwa yikuthi asiphatheki kweminye imidlalo. Kungakho sithi lonyaka kumele kube lomehluko, siphatheke kiyo yonke imidlalo,” kubika uMoyo.
UMoyo ubike ukuba ukhuthaza ababalisi besifazana ikakhulu ukuthi babeyingxenye yalo umkhosi wona ozaphathwa ngabaqondisi (Instructors) abalolwazi olugcweleyo.
“Sesike sakubona ukuthi indlela esiphatha ngayo imidlalo ezikolo yahlukene lalokho esihlangana lakho emncintiswaneni ephezulu kungakho kumele sihambelana lesikhathi ngoba layo imithetho yemidlalo itshintsha ukusa kwamalanga,” kuveza uMoyo.
Ithemu ezayo kubafundi ngeyemidlalo yebhola.
Ebuzwa ngendaba yokuthi abantwana ikakhulu abasemakhaya abalancwadi zokuzalwa noma iminyaka yabo ivuma ukuthi badlale uMoyo uthe lokhu bayakwazi mhlophe kodwa kubalulekile ukuthi abablisi bawulandele lumthetho ngoba ukuwephula kulesigwebo esithile.
“NjengeNaph silesu lokuthi siyebonana lalabo ababona ngokutholwa kwezincwadi lezi ukuze kube leMobile Registration okuluhlelo lapho abantwana abazathola khona ithuba lokudingelwa lezoncwadi,” kuchaza uMoyo.
UMoyo uphethe ngokuthi loluhlelo luzaqhutshwa kumaZone okuzenza abafundi benelise ukuyafinyelela lapho okuthathiswa khona incwadi lezi.
