uMthunywa
Gladmore Ncube
KULEJAHA lelokitshini leNketa 8 koBulawayo eliqanyukelwe yintambo lizama ukuzibophela ngoba laliwe yintombi ngeviki edluleyo.
Kubikwa ukuthi uMnumzana Japhet Mpofu uqanyukelwe yintambo ezama ukuzibulala ngoba uNkosazana Patricia Mlambo embikele ukuba usethole omunye umaqondana.
Intatheli ikhulumisane lomfakazi oqotho ongazange athande ukubethwa ngegama ovezele iphephandaba likazulu ukuthi isiga lesi siliqiniso njalo sitshiye izakhamizi zakule indawo zithithibele.
“Kambe sibili uyabe uphelele ekhanda uze ukhethe ukuzibulala ngoba waliwe yintombi? Phela kuyatholakala lokhu, umuntu nxa engasakuthandi uvele uyakutshiya.
“Okubuhlungu kuphinde kubesanhlekisa ngalindaba yikuthi uMnu Mpofu wazama ukuzibulala ngentambo kodwa wasebenzisa intambo engaqinanga yasimqamukela.
“Lokhu kutshengisa ukuthi ujaha lo wayevele engafuni ukuzibulala ngoba ngabe wayeqinisile ngesenzo sakhe lesi ngabe asiselaye lapha lamuhla,” kuchaza umfakazi oqotho.
Intatheli ikhulumisane loNkosazana Mlambo ngaloludaba othe uMnu Mpofu kayiqalisi into yakhe le ngoba uhlala emethusela ngokuzibulala ngakho-ke akumethusi lokhu.
“Mina lokhu akungethusi ngoba uMpofu wayehlala ethi singaxabana angethusele athi uzazibulala, kungenzeka njalo khathesi ubengafuni ukuzibulala ebefuna ukwethusela abantu kanye lami ukuthi ngimbuyelele.
“Kambe nxa uqinisile ngokuzibulala ngezake wehluleke ukuzicitsha umoya, ungazama iqhinga lehlule uyadinga elinye nxa uvele uzimisele. Mina angifuni lutho lokwenza laye ngoba impilo yami isendleleni khathesi njalo siyathandana lejaha lami elitsha,” kuchaza uNkszn Mlambo.
Intatheli ikhulumisane njalo loMnu Mpofu ngaloludaba wathi kezwa kuhle njalo enkonzweni bamtshela bathi engakhulumi ngaloludaba.
“Angizwa kuhle, kukhona okungikhathazayo njalo enkonzweni bathi ngingakhulumi ngaloludaba,” kutsho uMnu Mpofu andubana avale ucingo.
