uMthunywa
Thokozile Mbedzi
ABE-VETERINARY Services bakhuthaza abalimi abafuyileyo ukuthi baqaphele ukuqunjelwa ezifuyweni zabo ngoba kuvamile ngesikhathi sokumila kanye lokuhluma kotshani.
UDokotela wezifuyo eVeterinary Services uNdabezinhle Mkhwananzi uveze ukuthi inkomo, imbuzi kanye lezimvu kwandise ukuhlaselwa ngumkhuhlane wokuqunjelwa.
Ekhuluma lentatheli uDkt Mkhwananzi uveze ukuthi umkhuhlane wokuqunjelwa ubangelwa yikuthi kuyabe sokulokudla okunengi esisuswini sesifuyo kucine sokuhloba kungatholanga ithuba lokuthi kugayeke kuhle.
“Umkhuhlane lo ulemihlobo emibili; obangela amagwebu uphinde ukhukhumalise isisu kube lomunye owenza isifuyo sibe lodenda emlonyeni njalo ukhukhumalise lesisu.
Uthe nxa isifuyo siphuma amagwebu kuyabe kubangelwa yikudla kakhulu utshani kukanti ukukhukhumala lokuphuma udenda kubangelwa yikudla utshani obuletshefu.
“Abalimi sibakhuthaza ukuba bananzelele izifuyo zabo nxa bangazibona sezilala phansi ngendlela engajwayelekanga njalo seziphefumula nzima, ziyabe sezilomkhuhlane lo.
Kubikwa abalimi balakho njalo ukwenqabela ukuqunjelwa kwezifuyo ngokunanzelela ukuthi zidla isikhathi esinganani.
“Abalimi balakho ukuthi baphe izifuyo isikhathi sokudla besebezivalela. Nxa beqalisa bangazekela zidle okwemizuzu engu-30 besebezivalela kuthi ngemva kwamalanga amalutshwane bengezelele isikhathi sokudla siye kuhola. Lokhu uyabe ukwenzela ukuthi amathumbu ajayele utshani obuluhlaza.
UDkt Mkhwananzi wengezelele wathi abalimi kumele bahlale belemithi yokuthi belaphe izifuyo nxa sezigula.
“Abalimi nxa izifuyo zikhukhumele izisu zikhipha udenda kumele bazinike umuthi okuthiwa yi-Gasbloat ohlatshwa kuhlangothi lwenxele.
“Kuthi nxa zikhukhumele zikhupha amagwebu kumele ziphiwe i-Bloatguard nxa bengelayo balakho ukuzinathisa i-cooking oil isilinganiso esingaba yi300ml,” kuchasisa uDkt Mkhwananzi.
Uphethe ngokuthi lanxa abalimi belemisebenzi eminengi ngalesisikhathi kumele bazinike isikhathi sokuhlolisisa izifuyo zabo.
“Abalimi bakhululekile ukubikela abeVeterinary Services ngemikhuhlane ehlupha izifuyo zabo ukuze bangalahlekelwa yizifuyo mahlayana.
“Nxa abalimi bengelaqiniso lomkhuhlane bangaziphi imithi,” kuphetha Dkt Mkhwananzi.
