uMthunywa
Thokozile Mbedzi
l-AGRITEX ikhuthaza abalimi kundawana zonke zelizwe ukuba kabaqalise ukupha izifuyo zabo okunye ukudla okungakha umzimba wezifuyo zabo.
Ekhuluma lentatheli kaMthunywa uDistrict Livestock Officer, uCecilia Chakanyuka uthe abalimi kumele baqaphelisise izifuyo zabo ngalesi isikhathi ngoba ezinye seziqalile ukwehla isisindo.
“Abalimi kabaqalise khathesi ngenyanga kaMpandula ukunika izifuyo zabo ama-supplements ikakhulu i-fodder ngoba inengi labo lalandela izixwayiso zabalimisi zokuthi balime utshani bezifuyo zabo.
“Kungakho-ke khathesi abalimi sebengaqala ukunika izifuyo zabo utshani lobu ngoba bulungele inkomo kunye lembuzi. Izifuyo ezilamabele kumele baziqakathekise kakhulu ngalesi isikhathi ngoba akumelanga ziswele ukudla okweneleyo,” kutsho uNkszn Chakanyuka.
Uqhubekele phambili esithi ngaphandle kwalezo ezilamabele izibaya zabo nje zonke kumele babone ukuthi ziyathola ukudla okweneleyo ukuze bengalahlekelwa yizifuyo loba ukuthi zicine zingasazali kuhle ngenxa yokuswela ukudla.
Abalimi kumele banike izifuyo zabo ukudla utshani buze buhlume.
“Sikhuthaza abalimi ukuthi babone ukuthi banike izifuyo zabo i-fodder, utshani buze buhlume.
Uphinde wakhuthaza abalimi ukuthi bakhululekile ukuthi babuye emahofisini abo babanike ulwazi ngokunika izifuyo ama-supplements.
“Injongo yethu njengohlangothi olubona ngezezifuyo yikuthi sikhulise umhlambi wesizwe lokuthi nxa abalimi bethengisa izifuyo zabo bathole
inzuzo efaneleyo ezakwenza njalo benelise ukunakekela ezinye izifuyo ngemali abayitholileyo.
UNkkz Chakanyuka uphethe ngokuthi ukunakekela izifuyo kuphathisa izimuli lesizwe ngoba kulenyama ethengiswa elizweni kunye laphandle kwelizwe okuletha imali yakwamanye amazwe.
