uMthunywa
NGIYANGIZWE nxa kuqala umnyaka abantu befunga begomela bethi lokhu okunje angisakwenzi. Kuvamile ukuzwa abantu bethi angisanathi utshwala lokubhema igwayi, abanye njalo ngabathi bazakungena isonto elithize basebenzele iNkosi.
Uzwa omunye ethi ufuna ukusebenza athenge izifuyo kumbe akhe umuzi. Isikhathi esinengi lezingqondo zifikela umuntu engasela mali esehlaselwa ngumkhuhlane kaZibandlela (January disease).
Phela nxa kuphela umnyaka, imali ziyadliwa kube sengathi kudliwa umuthi weqolo.
Kuyabe kudliwa lokudla okungajwayekelanga lapho ekhaya lempahla zokugqoka kuthengwa ezisezingeni eliphezulu. Kuthi ngenxa yokuthi umuntu uyabe engasela mali ekuqaliseni komnyaka aqale ukubalisa ukuthi uzakwenza lokhu lalokhuya.
Isimanga nje yikuthi inengi labantu kujwayelekile ukuzwa betsho njalo kodwa bangahola ekupheleni kuka Zibandlela okuyiyo izisebenzi esithi yinyanga ende kakhulu phela inengi liyabe licine ukuhola phakathi laphakathi kukaMpalakazi amankampani evalela iKhisimusi.
Kuyabe sokufuneka imali zabo renti, ama-school fees uthole umuntu esesenwaya ikhanda okungapheliyo engazi ukuthi uyoyivusa kuphi imali. Njengoba usubophile izinqumo zakho zokuqala komnyaka qinisela uzame ngamandla wonke ukuthi uzifeze uzabona into zakho zikuhambela kuhle.
Gebha igodi ukhafulele anathe ucele kuMdali ukuthi akuphe amandla okungabuyeli emuva. Zimisele kukho konke ofisa ukukwenza kumnyaka ka2023.
Ayixabene.
