uMthunywa
Wathi eseqedile izifundo zaphezulu ezekolitshini uDingindawo wadinga umsebenzi, ebhalela amankampani ehlukeneyo izincwadi, wayengawutholi wacina engasakhethi umsebenzi ingqe nje kungumsebenzi.
Wayevukela edolobheni ethi mhlawumbe angaba lenhlanhla kodwa phinde. Omunye umngane wakhe ababehlangana bedinga umsebenzi baqala ukuxoxisana baze bajwayelana okwamagama, nguye oweza lecebo lokuthi uzwa kuthiwa ubutabane emazweni buyadlisa uhle uvele unothe ngokuphazima kweso.
Waqala ukudla amathambo engqondo ngoba ecabanga ukuthi abantu bazakuthini njalo kwakuzinsuku owayenguMongameli Mugabe esaphila, wayebuzonda ubutabane ngoba ethi lengulube zingcono ngoba ziyawazi umehluko phakathi kwenduna lensikazi.
Ngelinye ilanga walingeka esizwa umngane wakhe ethi usethole itikiti lendizamtshina lokuya eMelika laye wathi uyafuna ukuhamba lakanye laye walithola wahamba.
Kungakedluli umnyaka wayesethenge indlu yakhe emasabhabha wathenga njalo le pulazi, abazali bakhe labo wabathengela indlu elokitshini baphumula ukuloja.
izitabane
Njengaye wonke umzali wathaba waba manzi te encoma umntanakhe ukuthi wenza into ezilengqondo nanku uselendlu ebiza yena uqobo lwakhe. Wawuzwe uyise esezigqaja ngendodana yakhe ethi abanye bagugiselwa amabhulugwe yena umntanakhe umgugisela imota, ngoba wathi ebuye kukhefu wathenga imota ayitshiyela uyise esephindela.
Unina laye kwakuyiso leso uzwe esithi udlani okubabayo ngaphandle kwebilebile azifakela lona, ebabaza ukuthi uhlezi kuhle. Njengoba zizinengi izizalwane zakuleli ezasuka zaya kubo Melika zisithi zibalekela ukugugudeka komnotho welizwe, bakhona ababembona emahoteleni amakhulu esenza ubutabane.
Bathi wayengakhombi nje ethela amanzi elezithandwa zakhe ezinengi njalo zihlala emazweni ehlukeneyo, kahle kahle wayengumahotsha wesitabane yikho okwakusenza athole imali enengi ngesikhathi esifitshane, bathi nxa kwakusiba lemidlalo eyomhlaba (world cup) wayeyitshaya imali njalo engakhohlwa ukuthumela abazali bakhe.
Omakhelwane bakhe ababembona yibo ababuya sebechaza ukuthi akasebenzi kodwa uphiliswa yibutabane. Ayixabene.
