uMthunywa
Kulesitsho sesintu esithi kumnandi nxa kusenzakala kwabanye kodwa induku zingabheka ngakuyo indoda ikhala kuzekuse.
Sewake wananzelela ukuthi empilweni yethu thina abantu siphila lemikhakha yabantu abatshiyeneyo, abanye ngabafundisi, izinyanga, odokotela, abaphurofethi kunye lawo amasela asitshontshela loba yini, akhona agqekeza izimota, akhuthuza abantu izamba zabo abanye njalo ngabatshontsha izifuyo zabantu, njengemhlubulweni weningizimu emaNdebeleni kuvamile ukutshontshwa kwezifuyo ezifana lembuzi lenkomo.
Ngikhumbula omunye umgulukudu wesela kwathi mzukwana osowabo belitshontshele imbuzi ezintathu lagijima lagcwala iganga lonke, kwaziswa labakhulu bamapholisa, lalifuna lokuthi ngabe lamapholisa la ahamba lezinja labamabhiza ngabe bayaphuthuma bethungatha umkhondo wembuzi zakhe ezintathu nje kuphela, ekhohlwa ukuthi yena izibaya zabanye sezavalwa njalo babasa izigodo ngoba bengasela zifuyo sezaqedwa nguye ezihambisa emabhutsha emadolobheni.
Phela lumgulukudu ube ungabanjwa, abaziyo bathi wayesidla lamanye amapholisa akhohlakeleyo.
Kwakusithi loba angabotshelwa ukutshontsha izifuyo kusasa umbone esekhona uzwe eseklamasa, eqolotsha okwenkonyane esuthi uchago, ethi yena ulabameli abanzima.
Kodwa bathi emveni kokutshotshelwa wabubula okwengane ebhujelwe ngunina.
Ayixabene. Mehleli Nkunziyembongolo Dube.