uMthunywa
Cornelius Luphahla
ANGITHI nje babethi indoda iwa iphinde ivuke njalo igula elidala livame ukunuka amasi. Lapha ngichaza ukuthi noma nje kumnyaka ophelileyo iChicken Inn izenzele umathanda ngokuthatha iligi ngakho lonyaka kayingazithembisi lokhu ngoba vele bathi iKhisimusi ibuya kanye ngomnyaka. Singazithathela iBosso njengalokhu eyayikwenza kudala njengoba bethi igula elidala livame ukunuka amasi.
Noma amahlolanyama ayengathi kawasanqobi kuhle kumnyaka ophelileyo abanye abantu sebeze bengathi bafuna ukuwahlamukela kodwa-ke lonyaka kukhanya lawo avuke okwawo sibili. Lokhu kusuka kube yisifundo esihle lapha koMthwakazi ukuthi lendwangu iyalukhutha ugatsha ngakho akutsho ukuthi nxa ithe yalukhutha kayiphindi igade isihlahla, nanku yavuka khwatshu iBosso.
Ngiyazi abanye basebedelile ukuba iBosso ingafa yadla iDeMbare, sebeze bethi nxa zidlala bengazibukeli. Kodwa leza-ke elinye ilanga elavusa usinga kuMthwakazi wonke mhla iBosso itshaye yabhuqa iDeMbare. Mhlanokho sagcwaliseka esithi okungapheliyo kuyahlola njalo kusinwa kudedelwana. Kunjalo-ke lakuChicken Inn, noma nje iwudobhile umlenze wenkukhu kumnyaka ophelileyo akutsho ukuthi suzahlala ungowayo.
Kukhanya lonyaka umlenze lo ungaya kuBosso njengoba ihle yasungula umnyaka ngokuzibhuqa kangaka okuchaza ukuthi ihlome yaphelela sibili. Ngeqiniso kusobala ukuthi inkokheli zeBosso ziyibophe yaqina okokuthi kakho ongayinyikinya njengoba kuthiwa impinda muva yingozi. Lonyaka-ke izaphindisela okwenzakala kumnyaka ophelileyo. Angithi kumnyaka ophelileyo iBosso ize yavuka sokusekucineni komnyaka manje bekungasasizi ngoba ibisibongolela emswaneni sithethe kudala iChicken Inn.
Ukubhuqwa kweSundowns yiChicken Inn kakutsho ukuthi lalonyaka ingakuphinda lokhuya eyakwenza kumnyaka ophelileyo. Angithi nje ikhona iTsholotsho, ikhona iHwange, akhona njalo amanye amaqembu lawo azimisele ukunqoba lonyaka. Pho engakuvuma njalo ukwemukwa ubukhosi ihleli phezulu kwezandla yiyiphi? Asazi, lonyaka zindala zombili.
Angithi nje iTsholotsho lonyaka ize labanye abadlali abatsha abanye ngabaphetsheya kwaleli, abanye ngabakhonapha. Lokhu kuveza sobala ukuthi lonyaka zindala zombili, ngeqiniso kuyaze kulamule ukuthwasa komnyaka bakwethu. Kunjalo sibili abaholi bamaqembu la bayakufuna ukuhlala ezikhundleni zabo yikho besungula amaqhinga amatsha okuqinisa amaqembu abo.
Kunjalo-ke, kakho ongahlala phansi ebona ukuthi impi sisebaleni lomuzi. Yikho-ke wonke amaqembu aqaphe eqolo okonwabu njalo aphakathi kokulungiselela okukhulu ngoba ebona ukuthi sesisondele isikhathi sokuqala kweligi. Ngilethemba lokuthi amanye akhona seze adinga izanuse kanye labaphurofethi. Asazi, sizathi lidube ngamabala sethe bha!
