uMthunywa
Silo Mehleli Dube
KWAKUTHI mhla welanga ababili betshadayo kutshaywe imipululu kujatshulelwa ukuthi umdeni usuzaqhela ngoba kukhangelelwe ukuthi kuzazalwa abantwana.
Lezinsuku ukuziphatha kwama-2000 kusemlonyeni womuntu wonke. Abazali labakhangela abantwana bakhala ngokungalaleli kwabantwana abazalwa ngeminyaka yabo-2000 kusiyaphambili.
Abantwana bakhona inengi labo alilaleli, seliphenduke amahlongandlebe. Lapho abakhuzwa khona beqondiswa bomisa amakhanda baqinise lemidlambulo.
Kukhala abazali kukhale kunye lababalisi ezikolo ngoba bengenzi kuhle ezifundweni bathi lobuvila inengi labo likhuthalele ukwenza okubi. Lezinsuku lokungena emacansini kabasakwesabi ngitsho, bakubona kuyinto encinyane bacine sebezithwala baphambaniseke ezifundweni.
Uthola okungonkabi kuthatha izidakamizwa ezifanana lembamba yona ebamba ingqondo acine engasakwazi ukuthi vele yena ungubani.
Ngikhumbula ngibala olunye udaba kumaphephandaba lapho abatsha laba, abenza imidlalo yabo le ebizwa ngokuthi ngama-vuzu engingakwaziyo ukuthi kutshoni. Kulowomdlalo kuthiwa badakwa bazikhohlwa behluleka lokuvuka baye ngakibo. Bavuka belele umfana
lenkazana benqunu bengazi lokuthi izembatho zabo bazitshwathike ngaphi khona ukuthi bangabantwana besikolo bakukhohlwa nya baze babuya bathathwa ngamapholisa bagijinyiselwa esibhedlela sekuze kucatshangelwa ukuthi ingqondo zabo zingabe ziphambanisekile.
Inengi lalaba bantwana inhlonipho abalayo, umuntu omdala bambona sengani ngokuyinto nje abangakunyathela bakupatshaze kungabi ndaba zalutho.
Lezinkonzweni abafundisi bakhala ngabo, nxa umuntu esiza enkonzweni uyabe egqoke sengani ngumuntu ophakathi kokuhlaba ikhefu leli elibizwa ngolimi lwabondlebe zikhanyilanga (honey moon) bathi lokusukuma-sukuma umfundisi etshumayela.
Abanye uthola bedlalisa omakhalekhukhwini babo bengalalelanga intshumayelo, inengi labo baqaphele izinto ezimbi, balutshwane abenza izinto
ezibukwa ngumphakathi ngiyangizwe sekuthiwa ngabantwana bamaphilisi.
Ayixabene
