uMthunywa
Silo Mehleli Dube
Wathi esebheme wakholwa kunkanuko zomhlaba wakhumbula amazwi omunye umfundisi owamuzwa etshumayela emfeni ethi babusisiwe abafela eNkosini ngoba umbuso wezulu ungowabo, wadobha udondolo lwakhe kungesonto wayangena ethempelini.
Ukuhamba edondolozela kwakungabangwa yikuthi usegugile, kwakubangwa yikugula, lomzimba usungamathambothambo kungani yinsengwakazi ngesikhathi sikaMpandula.
Lenyawo wayehamba ezihudula, lalapho kwakungathiwa umlonde wawungamvumbulula lula. Engena endlini yokukhonzela kwanyemukula wonke umuntu, lomfundisi waze wema ukutshumayela, waqhubeka esehlezi phansi.
Uthe inkonzo isizaphela waphakamisa isandla wacela ukubhabhathizwa, waqala ngokuzibika ukuthi yena ungubani njalo lokuthi aze abekulesi isimo ayiso, kazange afihle lutho wathi yena inkunzi egwazayo ibonakala ngamanxeba lapho esitsho ukuthi emhlabeni uke wakholisa etshintshanisa omahotsha abelungu labansundu, njalo engagqoki lamajazi omkhwenyana.
Wakuveza kwaba sobala ukuthi wayeselegcikwane lengculaza njalo lomkakhe wayesembalekele eseyinsumbelume, bathula abazalwane bamlalela abanye bemzwela usizi kuthi abanye abalenhliziyo ezilukhuni bemkhangela banyantikane betshengisa ukumenyanya.
Umfundisi wamcela wasala laye wamamukela ebandleni lakhe, wathi esebonile ukuthi ngempela lendoda yayizimisele ekukhonzeni sekuphele phose umnyaka engakaze akhuthe ukuba sesontweni lemihlangano yonke eyihamba eseduze lakhatshana wasebhabhathizwa lomzimba wakhe wawusungcono ngoba wayesengene lakuhlelo lokunatha amaphilisi okucindezela ingcikwane ekhuthazwe ngumfundisi uqobo lwakhe.
Lalabana abazalwane ababemenyanya baqala ukumejwayela lejwabu lakhe selitshintshile selibutshelezi, isikhwekhwe esasigcwele ebunzini sesiphelile.
Lenkozweni waze waphiwa isikhundla bebona ukukhuthalela imisebenzi yebandla.
Ayixabene.
Umlobi ungamthinta ku0714355641
