uMthunywa
Silo Gladmore Ncube
UMHLABA lo susiyaphi, abadala babengasomi nxa bethi umhlaba uyahlaba nanko phela siyakubona lamuhla abantu sebephenduke baba zinyamazana zendle ezizingela abantu.
Endulo ukubulalana kwabantu bekusiba khona ngesikhathi sempi kodwa lamuhla sekuvuke obunye ubudlwangudlwangu obunzima abantu sebebulalana lemini libalele.
Thina sazi ukuthi abantu bayavikelana emnyameni lasemahlathini agcwele impisi lezilwane kodwa lamuhla sekuphendukile konke lokhu ngoba phela abantu sebejike baba yiwo amazimu la azingela abantu emizini yabo.
Kambe sibili sihlobo sami unembeza wakho uyabe usumtshiye ngaphi nxa sungicathamela endleleni ngisiya ekhaya ungibambe ungiphosele enqoleni yakho iduma usabalale lami ungibulale ufuna imali nje kuphela oyithola ungathengisa izitho zami.
Uthi imuli yami lengane zami zisale zisondliwa ngubani njengoba uyise suthethe impilo yakhe? Kambe uthi imuli yami izwe njani nxa sengingcwatshwa ngingasela khanda kumbe ezinye izitho zami?
Mahlabezulu asigcineni ukuthula phakathi kwethu singabi lobudlwangudlwangu ngoba phela thina asibondlebe zikhanya ilanga ababebulala abansundu ngokuphazima kweso angathi yizinanakazana.
Mthawakazi omuhle, kungaba kuhle kakhulu singahlala siqaphele ngoba lomhlaba sujikile kungathi sufuna ukubuyela kunina ngoba ukufa lokhu akuqalanga lamuhla.
Sathi sibonile abantu besabambana inkunzi babulalane kwaya kwaguquka sezwa sekuthiwa abantu sebephosela abantwana emanzini sathi sizwile lamuhla sekuqhubekile njalo kwayaphambili abantu sebethengisa izitho zabantu befuna inotho.
Kasazi kumbe wena obulala abantu uthengisa izitho zabo awuzalwanga njengathi esizelwe ngomama, mhlawumbe uzelwe yisilo ngoba phela nxa ungumuntu omunyiswe ngumama ekupha uthando ngezake uvuke ubunyamazana obunje.
Thina abanye sithuma onkosikazi bethu ezitolo wena uyabacathamela ubabambe ubadlwengule nxa uthanda ubabulale futhi. Uthi umntanami uzezwa njani nxa wena usunqunule unina wamenza into yakho yokudlala waqeda lapho wambulala?
Yebo sungambulala uthathe izitho zami uzithengise uthenge indlu enhle kanye lezimota ezinhle kodwa-ke umbuzo uthi uzaba lakho yini ukuthula, uzalala njani usazi ukuthi ulabantu phansi?
Isikhathi sisakhona bakaMthwakazi asitholeni ithuba lokuzihlolisisa lokukhuzana sibonisane ububi bokubulalana ngoba layo vele imali yegazi ayimnandi. Akekho ongajabulela ukubulawelwa isihlobo sakhe ngakho-ke ngilethemba elikhulu ukuthi indaba le izwakele njalo kuzaba lenguquko kube lentokozo esizweni sakithi.
