uMthunywa
Mehleli Dube
INSABA zothando zitshengiselwa ngendlela ezinengi ezitshiyeneyo, abanye bazitshengisela ngokwenza njalo langokukhuluma.
Banengi abatshengisela uthando olungekho, inhliziyo zabo zikude le, bevala okunye, bazembese esemvu yona ethi noma isihlaselwa ngamaganyane ayiwuhlabi umkhosi, ifa nje ithule sekungani iyabe izibuza ukuthi kambe ngabe yoneni.
Kuvamile kwabesintwana nxa kulento ayifunayo kumkakhe ukuthi amteme ngazo phela izangelo zakhe loba esezonde egane unwabu ubone esemoyizela eseveza elenja. Kuvamile njalo kubomama abangaziphathanga besemendweni kumbe owafika labantwabakhe bemukeleka lapha ekhaya. Indoda ithi ivela emsebenzini bayibize daddy ngoba phela libala lesiNgisi abanengi bathi litshengisa ngcono uthando kulelithi baba.
Ufica abanye abesilisa bangabizwa daddy sebethabe sebemanzi te ezwe esephuphuma ngothando lusabalala ngomgogodla lembambo aze ajaluke emsisileni engazi ukuthi bathi lala lulaza sikwengule.
Phela uyabe esenzela ukuthi langaliphi ilanga ungalokothi ucabange ukuxotsha abantwabakhe eza labo emzini wakho ukuthi bayedinga oyise, baze bakhule babe zinkalakatha zamadoda begcinwa befundiswa nguwe kungela mpazamo.
Uyabe esekwazi mhlophe ukuthi loba ungazitshila izikeyi zothando angamane athwale imitshaqana yakhe ahambe lengane zakhe okuyizo ezizomgcina. Sizwa kuthiwa amadlecatsha (small house) bayalithanda leligama uthole inengi losapho lukaAdam selusangene, seludidene ingqondo luyihulule imali okumele iyonakekela abantwabayo, kodwa abhejele ukuholela abantwana bedlalicatsha ngenxa yegama elithi daddy abakhe abantwana besidla ingqweqwe zomlomo.
Banengi abalamakhosikazi ashendezayo kodwa ngenxa yokuthi babizwa daddy uthi loba ulinga ukumlimukisa ngamazwi ahlakaniphileyo uthole ukuthi leligama selimembese ingubhamazwi yobuthutha afudumale angazabe esexeka lutho, abanjwe ngumfasimba libalele umuntu weNkosi. Ungangizwa kabi, angitsho ukuthi ungabizwa ngendlela othanda ngayo kodwa uboqaphela. Ayixabene.
0738305027
